‘तिमी राम्री छौ’, ‘लाली लगाएर आऊ’, ‘गाला टोक्न मन लाग्छ’ भन्दै जिस्काएको आरोप; ब्याचलर पढ्दासम्म पनि व्यवहार नरोकिएको दाबी, धम्कीपछि प्रहरी अनुसन्धानमा
रिपोर्टिङ नेपाल , श्रावण २२ , २०८३
ज्ञान दिने मन्दिर मानिने विद्यालयभित्रै आफ्नै १९ वर्षीया छात्रामाथि लामो समयदेखि यौनजन्य दुर्व्यवहार र मानसिक दबाब दिएको आरोपमा एक शिक्षक प्रहरी नियन्त्रणमा परेका छन्।
पीडित छात्राका अनुसार, ती शिक्षकले आफू कक्षा ११ र १२ मा अध्ययन गर्दादेखि नै उनलाई लक्षित गर्दै असहज र आपत्तिजनक अभिव्यक्ति दिने तथा जिस्काउने गरेका थिए। शिक्षकले उनलाई ‘तिमी राम्री छौ’, ‘लाली लगाएर आऊ’, ‘गाला टोक्न मन लाग्छ’ जस्ता कुरा भन्ने तथा ‘आउट ड्रेसमा आइजा’ भन्दै जिस्काउने गरेको छात्राको आरोप छ।
छात्राको भनाइअनुसार, कक्षा ११ र १२ मा अध्ययन गर्दादेखि सुरु भएको यस्तो व्यवहार उनी अहिले ब्याचलर तहमा अध्ययन गरिरहँदासमेत ती शिक्षकले नरोकिएको आरोप छ। समय बित्दै जाँदा शिक्षकका व्यवहार झन् आपत्तिजनक बन्दै गएको छात्राको दाबी छ।
घटनाले गम्भीर रूप त्यतिबेला लिएको छात्राको भनाइ छ, जब ती शिक्षकले उनलाई ‘मसँग एक … बितायौ भने तिम्रो लाइफ सेट गरिदिन्छु, परीक्षामा पास गराइदिन्छु’ भन्दै अनैतिक प्रस्ताव राखे।
शिक्षकले आफूलाई यस्तो प्रस्ताव राखेपछि छात्राले आफू उनको विद्यार्थी भएको भन्दै त्यस्तो कुरा नगर्न आग्रह गरेको बताएकी छन्। ‘म तपाईंको विद्यार्थी हुँ, मलाई यस्तो कुरा नगर्नुस्, तपाईंको कुनै सहयोग चाहिँदैन’ भन्दै स्पष्ट रूपमा अस्वीकार गर्दासमेत शिक्षकले आफ्नो व्यवहार नरोकिएको उनको आरोप छ।
बरु ती शिक्षकले ‘माया लागेपछि के विद्यार्थी, के शिक्षक?’ भन्दै आफूलाई लगातार अवाञ्छित सन्देश पठाउने गरेको छात्राको दाबी छ।
रिपोर्टिङ नेपाल विद्यालयमा पुग्दा शिक्षक भेटिएनन्
घटनाबारे जानकारी पाएपछि रिपोर्टिङ नेपालको टोली घटनाको सत्यतथ्य बुझ्न तथा स्थलगत रिपोर्टिङका लागि सम्बन्धित विद्यालयमा पुगेको थियो। रिपोर्टिङ नेपाल टोली विद्यालयमा पुग्दा ती शिक्षक केही घण्टा पढाएर विद्यालयबाट निस्किसकेका थिए। त्यसकारण पहिलो पटकको रिपोर्टिङका क्रममा उनीसँग प्रत्यक्ष भेट हुन सकेन। त्यसपछि २०८३ साउन २२ गते पुनः रिपोर्टिङका क्रममा ती शिक्षकसँग भेट भएको थियो। भेटका क्रममा उनले आफूले कुनै गलत काम नगरेको दाबी गरे। तर, छात्रासँग भएको भनिएको कुराकानी तथा घटनासँग सम्बन्धित प्रमाणबारे बुझ्ने क्रममा मोबाइल जाँच गर्न आग्रह गर्दा उनले अत्तालिँदै आफ्नो मोबाइल देखाउन अस्वीकार गरेका थिए।
घटना बाहिरिने डरले ज्यान मार्ने धम्की दिएको आरोप
घटना यतिमै सीमित नभई पीडित छात्रालाई ज्यान मार्ने धम्कीसमेत दिइएको आरोप छ।पीडित छात्राका अनुसार, घटना बाहिरिएर आफूविरुद्ध कुरा सार्वजनिक हुने डरले ती शिक्षकले उनलाई ह्वाट्सएपमार्फत ‘यो कुरा कसैलाई भनिस् भने तँलाई गायब पारिदिन्छु, तेरो ज्यान सिद्ध्याइदिन्छु’ भन्दै धम्की दिएका थिए।यस्तो धम्कीपछि आफू थप त्रसित भएको छात्राको भनाइ छ। शिक्षकबाटै छात्रालाई लक्षित गरी यस्तो धम्की आएको आरोप सार्वजनिक भएपछि घटनाले विद्यालयमा छात्राहरूको सुरक्षा र शिक्षकको आचरणमाथि समेत गम्भीर प्रश्न उठाएको छ।
प्रहरी नियन्त्रणमा आरोपित शिक्षक
छात्रामाथि भएको भनिएको दुर्व्यवहार तथा ज्यान मार्ने धम्कीबारे जिल्ला प्रहरी कार्यालयमा जानकारी गराइएपछि इलाका प्रहरी कार्यालय बानियाभार (जयनगर) ले आरोपित शिक्षकलाई नियन्त्रणमा लिएको छ।
प्रहरीले पीडित १९ वर्षीया छात्राबाट घटनासम्बन्धी औपचारिक उजुरी दर्ता गराउने प्रक्रिया अघि बढाएको जनाएको छ। ति पीडित १९ वर्षीया छात्रालाई प्रहरीले साइबर अपराध (Cyber Crime) मा औपचारिक उजुरी दर्ता गर्न लगाएर अनुसन्धानको प्रक्रियालाई कडा रूपमा अगाडि बढाउने बताएको छ ।
यद्यपि, आरोपित शिक्षकले आफूले कुनै गलत काम नगरेको दाबी गरेका छन्। त्यसैले पीडितको आरोप, आरोपितको भनाइ तथा उपलब्ध प्रमाणको अनुसन्धानपछि घटनाको वास्तविकता थप स्पष्ट हुने देखिन्छ।
शिक्षकबाटै छात्रामाथि यस्तो आरोप, विद्यालय सुरक्षामाथि प्रश्न
शिक्षकलाई विद्यार्थीको भविष्य निर्माण गर्ने जिम्मेवारी दिइएको हुन्छ। तर, आफ्नै छात्रालाई लक्षित गरी आपत्तिजनक अभिव्यक्ति दिने, व्यक्तिगत सम्बन्धका लागि दबाब दिने, भविष्य र परीक्षामा सहयोग गरिदिने प्रलोभन देखाउने तथा धम्की दिएको आरोप लाग्नु गम्भीर विषय हो।
विशेषगरी कक्षा ११ र १२ मा अध्ययन गर्दादेखि ब्याचलर तहसम्म पनि यस्तो व्यवहार निरन्तर भएको पीडितको आरोपले शिक्षक–विद्यार्थी सम्बन्ध, विद्यालयको सुरक्षा र विद्यार्थीको संरक्षण प्रणालीमाथि गम्भीर प्रश्न उठाएको छ।
यदि अनुसन्धानबाट आरोप पुष्टि भएमा सम्बन्धित व्यक्तिमाथि प्रचलित कानुनअनुसार आवश्यक कानुनी कारबाही हुनुपर्ने देखिन्छ। विद्यालय विद्यार्थीका लागि सुरक्षित स्थान बन्नुपर्ने भएकाले यस्ता आरोपलाई सम्बन्धित निकायले गम्भीरतापूर्वक छानबिन गर्नुपर्ने देखिन्छ।
यस घटनाको अनुसन्धान कहाँसम्म पुग्छ, आरोपित शिक्षकविरुद्ध कस्तो कानुनी प्रक्रिया अघि बढ्छ र उपलब्ध डिजिटल प्रमाणले के देखाउँछ भन्ने विषयमा रिपोर्टिङ नेपालले निरन्तर निगरानी र रिपोर्टिङ गर्नेछ।
थप तथ्य तथा कानुनी प्रक्रियासम्बन्धी अपडेटका लागि हेर्दै गर्नुहोस्—रिपोर्टिङ नेपाल।
बिज्ञापन-YM-AD
