आकस्मिक स्वास्थ्यदेखि सञ्चारसम्म ‘बुद्धभूमी नेपाल’को सक्रियता, २४ घण्टा एम्बुलेन्स र ‘कुण्डली’ साप्ताहिक प्रकाशन

बर्दिया, २०८३ भदौ ३ गते । बर्दियाको बारबर्दिया नगरपालिका–८, औरीमा स्थापित सामाजिक संस्था बुद्धभूमी नेपाल (Buddha Land Nepal–BL Nepal) ले आकस्मिक स्वास्थ्य सेवा, सामाजिक उद्धार तथा सूचना–सञ्चारका क्षेत्रमा आफ्नो गतिविधिलाई निरन्तरता दिँदै आएको छ। ग्रामीण तथा आर्थिक रूपमा कमजोर समुदायलाई लक्षित गर्दै संस्थाले २४ सै घण्टा आकस्मिक एम्बुलेन्स सेवा सञ्चालन गर्नुका साथै स्थानीय विषयवस्तुलाई प्राथमिकता दिँदै ‘कुण्डली’ साप्ताहिक पत्रिका समेत नियमित प्रकाशन गर्दै आएको छ।

संस्था दर्ता ऐन, २०३४ बमोजिम जिल्ला प्रशासन कार्यालय बर्दियामा दर्ता नं. ८७५ सहित २०७७ सालमा स्थापना भएको बुद्धभूमी नेपाल समाज कल्याण परिषद्को आबद्धता नं. ५१८११ मा समेत आबद्ध रहेको संस्थाले जनाएको छ। स्थापनादेखि नै पिछडिएका तथा ग्रामीण समुदायमा सामाजिक सेवा विस्तार गर्दै आएको संस्थाले स्वास्थ्य क्षेत्रलाई आफ्नो प्रमुख प्राथमिकतामध्ये एक बनाएको छ।

आर्थिक अवस्था र बिरामीको प्रकृतिअनुसार सहुलियत

संस्थाले बिरामीको आर्थिक अवस्था तथा रोगको प्रकृतिलाई आधार मानेर विशेष छुट र सहुलियत कार्ड उपलब्ध गराउँदै आएको जनाएको छ। सिकलसेल, थालेसिमिया, मिर्गौला, मुटु तथा दीर्घरोगी, क्यान्सर पीडित, अपांगता भएका व्यक्ति, बालबालिका, गर्भवती महिला र ज्येष्ठ नागरिकलगायतलाई प्राथमिकतामा राखेर सेवा प्रदान गर्ने गरिएको संस्थाको भनाइ छ।

बारबर्दिया नगरपालिकाभित्र निशुल्क तथा नगरपालिका बाहिर सहुलियत दरमा आकस्मिक एम्बुलेन्स सेवा सञ्चालन भइरहेको संस्थाले जनाएको छ। यही अभियानअन्तर्गत ‘एक घर, एक सहुलियत कार्ड’ तथा जीवन रक्षाका लागि चन्दा–दान महाअभियान सञ्चालन गरिएको छ।

संस्थाका अध्यक्ष अशोक के.सी. का अनुसार आगामी दिनमा सामुदायिक अस्पताल/क्लिनिक सञ्चालन गर्ने तयारीसमेत रहेको छ। सहुलियत कार्ड प्राप्त गरेका घरपरिवारलाई सहुलियत दरमा उपचार उपलब्ध गराउने तथा गुलरिया, कोहलपुर र नेपालगन्जसम्म समेत एम्बुलेन्स सेवा विस्तार गर्ने योजना रहेको छ ।

यस अभियानको अर्को उल्लेखनीय पक्ष संस्थाका अध्यक्ष अशोक के.सी. स्वयं एम्बुलेन्स चालकको भूमिकामा अग्रपंक्तिमा खटिएर बिरामीको सेवामा सक्रिय  रहेको स्थानीयको भनाइ छ।

स्वास्थ्यसँगै सञ्चार क्षेत्रमा पनि निरन्तरता

बुद्धभूमी नेपालले स्वास्थ्य तथा सामाजिक सेवासँगै नागरिकलाई सूचना र समाचारमार्फत सुसूचित गराउने उद्देश्यले सञ्चार क्षेत्रमा समेत काम गर्दै आएको छ। संस्थाको प्रकाशन तथा अध्यक्ष अशोक के.सी. को सम्पादनमा ‘कुण्डली’ नेपाली भाषाको साप्ताहिक पत्रिका बर्दियाबाट नियमित रूपमा प्रकाशित हुँदै आएको छ।

जिल्ला प्रशासन कार्यालय बर्दियाबाट स्थायी इजाजत तथा दर्ता नं. ४९ प्राप्त ‘कुण्डली’ साप्ताहिक प्रत्येक आइतबार ८ पृष्ठमा ५०० प्रति प्रकाशन हुने गरेको संस्थाले जनाएको छ। पत्रिकाको प्रधान सम्पादकको जिम्मेवारी समेत अध्यक्ष अशोक के.सी. ले सम्हाल्दै आएकाछन्  भने संवाददाता प्रमुख राजु नगाल क्षेत्री ले समाचार संकलन तथा सम्पादनमा सहयोग गर्दै आएकाछन्।

ओम शान्ति अफसेट प्रेस, गुलरिया बाट मुद्रण हुँदै आएको ‘कुण्डली’ले स्थानीय आवाज, सामाजिक मुद्दा तथा नागरिक सरोकारका विषयलाई प्राथमिकता दिँदै आएको संस्थाको भनाइ छ।

वातावरणदेखि विपद् उद्धारसम्म गतिविधि

संस्थाका सचिव रामराज थारु का अनुसार बुद्धभूमी नेपालले स्वास्थ्य र सञ्चारका अतिरिक्त आन्तरिक राजस्व कार्यालयबाट स्वीकृत कार्यक्षेत्रभित्र रही वातावरण संरक्षण, प्राकृतिक प्रकोप उद्धार, फोहोरमैला व्यवस्थापन तथा सामाजिक अनुसन्धान लगायतका गतिविधि पनि अघि बढाउँदै आएको छ।

संस्थाले आगामी दिनमा स्थानीय सरकार, समुदाय तथा अन्य सरोकारवाला निकायसँगको सहकार्यलाई थप प्रभावकारी बनाउँदै सामाजिक सेवाका गतिविधि विस्तार गर्ने जनाएको छ।

आकस्मिक स्वास्थ्य सेवाबाट सुरु भएको बुद्धभूमी नेपालको अभियान अहिले सूचना–सञ्चार, वातावरण संरक्षण र सामाजिक सेवासम्म विस्तार हुँदै गएको छ। ग्रामीण क्षेत्रमा सेवा र सूचनाको पहुँच बढाउने उद्देश्यसहित संस्थाले आफ्ना गतिविधिलाई निरन्तरता दिइरहेको जनाएको छ।

बिज्ञापन-YM-AD

बर्दिया, २०८३ भदौ ४ गते ।

बारबर्दियामा विद्युत् कटौतीको समस्या पछिल्लो समय एक दिनको विषय मात्र बनेको छैन। महिनौँदेखि हरेक साता लामो समय विद्युत् कटौती हुँदै आएको भन्दै स्थानीयवासी तथा व्यवसायीहरू प्रभावित बनेका छन्।

पछिल्लो पटक असोज ३ गते शनिबार र असोज ४ गते आइतबार बिहानदेखि साँझ ५ बजेसम्म विद्युत् आपूर्ति बन्द गरिएको छ। रुखको हाँगा कटान तथा विद्युत् लाइन आसपासको झाडी सफाइ अर्थात् ‘बुस कटिङ’का लागि विद्युत् बन्द गरिएको बताइएको छ।

नियमित रूपमा लामो समय विद्युत् बन्द हुँदा यसको प्रत्यक्ष असर सरकारी कार्यालयमा मात्र नभई निजी क्षेत्र, बजार तथा दैनिक व्यवसायमा समेत परेको छ। बिदाका दिन सरकारी कार्यालयहरू बन्द भए पनि धेरै निजी संस्था, प्रिन्टिङ प्रेस, साइबर, फोटो स्टुडियो, पसल तथा अन्य व्यवसाय सञ्चालनमै रहने भएकाले विद्युत् कटौतीले उनीहरूको काम प्रभावित हुने गरेको छ।

त्यसैगरी, विद्युत् आवश्यक पर्ने भेटेरिनरी भ्याक्सिन, डेरीका दूध तथा दुग्धजन्य पदार्थ, मासु पसलमा राखिने मासु र अन्य चिस्यान आवश्यक पर्ने सामग्रीहरू लामो समय विद्युत् नहुँदा बिग्रिने तथा आर्थिक क्षति हुने जोखिम बढ्छ।

हरेक साता किन यति लामो विद्युत् कटौती?

रुखका हाँगा तथा झाडी कटान विद्युत् लाइनको सुरक्षाका लागि आवश्यक प्राविधिक काम हुन सक्छ। तर प्रश्न काम गर्नुपर्ने वा नपर्ने भन्ने होइन, त्यस्तो कामको समय व्यवस्थापन र कार्ययोजनाबारे हो।

महिनौँदेखि हरेक साता लामो समय विद्युत् कटौती गर्नुपर्ने अवस्था किन दोहोरिइरहेको छ?

यदि एउटै प्रकृतिको काम नियमित रूपमा गर्नुपर्ने हो भने त्यसलाई चरणबद्ध तथा एकीकृत योजना बनाएर कम समयमै सम्पन्न गर्न सकिँदैन?

विद्युत् कटौतीबाट सर्वसाधारण र व्यवसायमा पर्ने असरलाई ध्यानमा राखेर काम गर्ने समय परिवर्तन गर्न सकिँदैन?

यी प्रश्नको स्पष्ट जवाफ सम्बन्धित विद्युत् कार्यालयबाट आउन आवश्यक छ।

काम गर्नैपर्ने हो भने समय परिवर्तन गरौँ : Reporting Nepal को सुझाव

Reporting Nepal को बुझाइमा रुख कटान तथा ‘बुस कटिङ’जस्ता काम विद्युत् सुरक्षाका लागि गर्नैपर्ने भए काम गर्ने समयलाई सर्वसाधारणमा कम असर पर्ने गरी व्यवस्थापन गर्न सकिन्छ। Reporting Nepal को सुझाव छ—यस्ता काम बिहान ५ बजेदेखि १० बजेसम्मको समयभित्र केन्द्रित गर्न सकिन्छ। यसका केही व्यावहारिक कारण छन्।

पहिलो, बिहानको समयमा बजार, साइबर, प्रिन्टिङ प्रेस, बैंक तथा कार्यालयलगायतका धेरै व्यवसाय तुलनात्मक रूपमा कम व्यस्त हुने भएकाले विद्युत् कटौतीको प्रभाव केही कम हुन सक्छ। बिहान १० बजेपछि बजार र कार्यालयहरू पूर्ण रूपमा सञ्चालनमा आउने भएकाले त्यसपछि लामो समय विद्युत् बन्द हुँदा प्रत्यक्ष असर बढी पर्न सक्छ।

दोस्रो, बिहानको समयमा तापक्रम तुलनात्मक रूपमा कम हुने भएकाले सर्वसाधारणलाई गर्मीको समस्या कम हुनुका साथै प्राविधिक टोलीलाई समेत काम गर्न सहज हुन सक्छ।

तेस्रो, बिहान ५ देखि १० बजेसम्मको पाँच घण्टे समयलाई प्रभावकारी रूपमा प्रयोग गर्दै आवश्यक परे थप जनशक्ति तथा प्राविधिक टोली परिचालन गरेर कामलाई तीव्र गतिमा सम्पन्न गर्न सकिन्छ।

यसरी विद्युत् सुरक्षाका लागि गर्नैपर्ने काम पनि निरन्तर राख्दै सर्वसाधारण तथा व्यवसायमा पर्ने असरलाई कम गर्न सकिने Reporting Nepal को सुझाव हो।

‘हेलो सरकार’मा Reporting Nepal ले नै फोन गर्‍यो

विद्युत् कटौतीको विषयमा Reporting Nepal ले नै ‘हेलो सरकार’मा फोन गरी बारबर्दियामा भइरहेको लामो विद्युत् कटौती र त्यसबाट परेको समस्याबारे जानकारी गराएको छ।

‘हेलो सरकार’बाट Reporting Nepal लाई “हुन्छ, म तपाईंको कुरा तत्काल सम्बन्धित निकायमा जानकारी गराउँछु” भन्ने प्रतिक्रिया प्राप्त भएको छ। उक्त फोन कुराकानीको रेकर्ड Reporting Nepal सँग सुरक्षित रहेको छ।

यसैगरी, विद्युत् कटौती तथा रुखको हाँगा कटानसम्बन्धी विषयमा सम्बन्धित विद्युत् कार्यालयका जिम्मेवार अधिकारीसँग Reporting Nepal ले प्रतिक्रिया लिन फोनमार्फत सम्पर्कको प्रयास गरेको भए पनि फोन उठेन। फोन नउठाउनुको कारण भने सम्बन्धित अधिकारीको आधिकारिक प्रतिक्रिया प्राप्त भएपछि मात्र स्पष्ट हुनेछ।

अब विद्युत् कार्यालयको जवाफ के हो?

• महिनौँदेखि हरेक साता लामो समय विद्युत् कटौती गर्नुपर्ने अवस्था किन दोहोरिइरहेको छ?
• रुख कटान तथा ‘बुस कटिङ’को कामको दीर्घकालीन कार्ययोजना के हो?
• एउटै क्षेत्रमा पटक–पटक विद्युत् बन्द गर्नुपर्ने अवस्था किन आइरहेको छ?
• सर्वसाधारण तथा व्यवसायमा पर्ने असरलाई ध्यानमा राखेर बिहानको समयमा काम गर्न सकिने सम्भावना किन खोजिँदैन?
• विद्युत् कटौतीको अवधि कम गर्न थप जनशक्ति तथा प्राविधिक टोली परिचालन गर्न सकिन्छ कि सकिँदैन?

विद्युत् लाइनको सुरक्षा र नियमित विद्युत् आपूर्ति दुवै आवश्यक विषय हुन्। त्यसैले सुरक्षाका लागि गर्नैपर्ने प्राविधिक कामलाई रोक्ने होइन, त्यसको समय र कार्ययोजना व्यवस्थित गरेर सर्वसाधारणमा पर्ने असर कम गर्ने विषयमा सम्बन्धित निकायले ध्यान दिन आवश्यक देखिन्छ।

भिडियो हेर्नुहोस : 

बिज्ञापन-YM-AD