२९ फाल्गुन २०८०, बर्दिया
बिज्ञापन-YM-AD
पाञ्चजन्यमा शिक्षाको बहस : पाञ्चजन्य माध्यमिक विद्यालयमा शैक्षिक सुधार अन्तरक्रिया सम्पन्न
५ असोज २०८२ / बारबर्दिया — बारबर्दिया नगरपालिका–४ मा अवस्थित पाञ्चजन्य माध्यमिक विद्यालयले विजया दशमी तथा दिपावलीको पावन अवसर पारेर विद्यालयको शैक्षिक, भौतिक तथा आर्थिक सुधारबारे अन्तरक्रिया कार्यक्रम सम्पन्न गरेको छ।
बारबर्दिया नगरपालिका वडा नं. ४ का वडा अध्यक्ष तथा विद्यालय व्यवस्थापन समिति (बि.व्य.स.) का अध्यक्ष सीताराम योगीको अध्यक्षतामा सम्पन्न कार्यक्रममा बारबर्दिया नगरप्रमुख छबिलाल थारु प्रमुख अतिथि रहनुभएको थियो। विशेष अतिथि पूर्व बि.व्य.स. अध्यक्ष पूर्ण शर्मा हुनुहुन्थ्यो भने कार्यक्रम सञ्चालन तोयानाथ सापकोटाले गर्नुभएको थियो। कार्यक्रममा शिक्षा शाखा संयोजक हरि प्रसाद पोख्रेल, पूर्व संयोजक कृष्ण प्रसाद पोख्रेल, वडा नं. २ का वडा अध्यक्ष राम फेरन थारु, वडा नं. ४ का बडघर, बुद्धिजीवी, अभिभावक, विद्यार्थी प्रतिनिधि लगायतको सक्रिय उपस्थिति रहेको थियो।
कार्यक्रममा स्वागत मन्तव्य विद्यालयका सहायक प्र.अ. गोमा चालिसेले राख्नुभएको थियो भने प्र.अ. सोभा आचार्यले विद्यालयको उद्देश्य, प्रगति र चुनौतीबारे प्रष्ट पार्दै शिक्षा गुणस्तर वृद्धिका लागि भइरहेको प्रयासबारे जानकारी दिनुभयो। उहाँले विद्यालयले पछिल्ला वर्षमा शैक्षिक गुणस्तरमा सुधार ल्याउन विभिन्न कार्यक्रम अघि सारेको जानकारी दिनुभयो। जसअन्तर्गत कक्षा १ देखि ८ सम्मका लागि उपचारात्मक कक्षा सञ्चालन, कक्षा ८ र १० का लागि दिवा तथा रात्रीकालीन छात्रावासको व्यवस्था, टोल–टोलमा अभिभावक भेला तथा सहयोग समिति गठन, गणित, कृषि, कम्प्युटर प्रयोगशाला, पुस्तकालय र विज्ञान प्रयोगशालाका लागि सामग्री व्यवस्थापन तथा किशोरी विद्यार्थीका लागि महिनावारी आराम कक्षको स्थापना गरिएको छ।
कार्यक्रमका प्रमुख अतिथि नगरप्रमुख छबिलाल थारुले विद्यालयको शैक्षिक सुधारमा नगरपालिकाले उच्च प्राथमिकता दिएको उल्लेख गर्दै भन्नुभयो कि घोकन्ते शिक्षा अब पुरानो ढर्रा भएको छ। उहाँले अबको आवश्यकता भनेको विद्यार्थीलाई बुझ्ने, सोच्ने र सिर्जना गर्ने बनाउने शिक्षा भएको बताए। उहाँका अनुसार शिक्षकले विद्यार्थीको स्तर अनुसार बुझाउन सक्ने तरिकाले पढाउनुपर्छ। नगरपालिकाले शिक्षामा कुल बजेटको ३८ प्रतिशत विनियोजन गरेको छ। यो ठूलो लगानी भएको तर यो लगानी तब मात्र सार्थक हुने उहाँले बताउनुभयो जब विद्यार्थीले वास्तविक ज्ञान आर्जन गर्छन्। नगरको पैसा खेर नजाओस् भनेर विद्यार्थीलाई बुझ्ने गरी पढाएर बारबर्दियालाई शैक्षिक क्षेत्रमा अग्रस्थानमा पुर्याउनुपर्ने उहाँको भनाइ थियो। नगरप्रमुख थारुले विद्यालयमा गुणस्तरीय पूर्वाधार, दक्ष शिक्षक र नियमित मूल्यांकन प्रणालीले मात्र शैक्षिक गुणस्तर बढाउने विश्वास पनि व्यक्त गर्नुभयो।
विशेष अतिथि पाञ्चजन्य माविकै पूर्व बि.व्य.स. अध्यक्ष पूर्ण शर्माले विद्यालयको आर्थिक सुदृढीकरणमा आफूले पुर्याएको योगदान सम्झिँदै आफू सहकारीको अध्यक्ष हुँदा विद्यालयको भविष्यका लागि विद्यालयमा भएको ७० लाख रुपियाँ सहकारीमा जम्मा गर्न लगाएर १० प्रतिशत ब्याज दिएको उल्लेख गर्नुभयो। उहाँका अनुसार त्यस ब्याजबाट निजीस्रोतका शिक्षकलाई तलब दिनेदेखि विद्यालय सञ्चालनसम्म ठूलो सहजता भएको थियो।
यस विषयमा विद्यालय व्यवस्थापन समिति अध्यक्ष एबम वडा नम्मर ४ का वडाअध्यक्ष सीताराम योगीले आफ्नो विचार राख्दै विद्यालयमा विगतमा भएको योगदानको कदर गर्दै त्यस रकमको सदुपयोगबारे स्पष्ट विवरण समेत आवश्यक रहेको बताउनु भयो । उहाले भन्नुभयो “त्यो ७० लाख विद्यालयमा जम्मा भएको अहिले त्यो रकम कहाँ गयो ? यसको हिसाब–किताब खोज्नुपर्छ। ” भन्दै उहाले विद्यालयको स्रोत र साधन कसरी व्यवस्थापन गर्ने भन्नेमा पारदर्शिता, जवाफदेहिता र साझा जिम्मेवारी महत्वपूर्ण हुनेमा जोड दिनुभयो। उहाँका अनुसार विद्यालयको दिगो विकासका लागि शिक्षक, विद्यार्थी, अभिभावक र स्थानीय समाज सबैले समान रूपमा जिम्मेवारी बोक्नुपर्ने हुन्छ। उहाँले विद्यार्थीलाई पढाउँदा उनीहरूको मनोविज्ञान बुझेर सिकाउने अभ्यासलाई अझै बढाउनुपर्ने र अभिभावकले पनि घरमै बालबालिकाको सिकाइमा साथ दिनुपर्नेमा जोड दिनुभयो।
यसरी सम्पन्न शैक्षिक सुधार अन्तरक्रिया कार्यक्रममा विद्यालयका प्रगति, चुनौती र सुधारका योजनामाथि गहन छलफल भएको छ। स्रोत र साधनको पारदर्शी उपयोगबारे उठेका प्रश्नहरूले विद्यालयलाई अझै व्यवस्थित र जवाफदेही ढंगले अघि बढ्न प्रेरणा दिएको छ। कार्यक्रममा सहभागीहरूको निष्कर्ष अनुसार यो अन्तरक्रियाले बारबर्दियामा शैक्षिक सुधारबारे नयाँ दृष्टिकोण र बहसको सुरुवात गरेको छ ।
बिज्ञापन-YM-AD
बारबर्दियामा ब्राउन सुगर र २१ हजार २७५ रुपैयाँसहित २९ वर्षीय युवा पक्राउ
रिपोर्टिङ नेपाल , भाद्र १८ , २०८३ | बर्दिया । बर्दियाको बारबर्दिया नगरपालिका–७, सिउनियाका २९ वर्षीय दिलीप रावत ब्राउन सुगर र नगद रकमसहित पक्राउ परेका छन्।
बानियाभार स्थित इलाका प्रहरी कार्यालय हाल जयनगर बाट भाद्र १७ गते खटिएको गस्ती टोलीले नियमित शान्ति–सुरक्षा तथा गस्तीका क्रममा शंकास्पद अवस्थामा रावतलाई फेला पारेपछि जाँच गरेको थियो। जाँचका क्रममा उनको साथबाट ६० मि.ग्राम ब्राउन सुगर र नगद रु. २१ हजार २ सय ७५ बरामद भएको जिल्ला प्रहरी कार्यालय बर्दियाले जनाएको छ।
प्रहरीका अनुसार रावतलाई नियन्त्रणमा लिएर खानतलासी गर्दा उक्त लागूऔषध तथा नगद रकम फेला परेको हो। बरामद गरिएको ब्राउन सुगर र नगद प्रहरीले नियन्त्रणमा लिएको छ।
घटनापछि रावतलाई इलाका प्रहरी कार्यालय बानियाभारको हिरासतमा राखिएको छ। उनीसँग बरामद भएको ब्राउन सुगर र नगद रकमका सम्बन्धमा प्रहरीले थप अनुसन्धान तथा सोधपुछ अघि बढाएको जनाएको छ।
प्रहरीले बरामद भएको लागूऔषध कहाँबाट ल्याइएको हो, त्यससँग सम्बन्धित अन्य कुनै व्यक्ति वा पक्षको संलग्नता छ/छैन तथा बरामद भएको नगद रकमको सम्बन्ध घटनासँग छ/छैन भन्ने विषयमा अनुसन्धान गरिरहेको जनाएको छ।
लागूऔषध नियन्त्रण तथा अवैध ओसारपसार रोक्न प्रहरीले बर्दियाका विभिन्न क्षेत्रमा गस्ती, निगरानी तथा शंकास्पद गतिविधिमाथि जाँच गर्दै आएको छ। सोही क्रममा रावत पक्राउ परेको प्रहरीले जनाएको हो।
यस घटनामा पक्राउ परेका रावतसँग सम्बन्धित थप विवरण तथा अनुसन्धानबाट खुल्ने तथ्यका आधारमा आवश्यक कानुनी प्रक्रिया अघि बढाइने प्रहरीले जनाएको छ।
घटनाबारे थप अनुसन्धान भइरहेको जिल्ला प्रहरी कार्यालय बर्दियाले जनाएको छ।
बिज्ञापन-YM-AD
बारबर्दियामा राधाकृष्ण थारू जनसेवा केन्द्रद्वारा सन् २०२६ को वार्षिक समीक्षा सम्पन्न, तीनवर्षे परियोजनाका उपलब्धि सार्वजनिक
बर्दिया,२०८३ कार्तिक , २० ।
किशोरकिशोरीको स्वास्थ्य, शिक्षा तथा अधिकार संरक्षणमा केन्द्रित किशोरकिशोरी यौन तथा प्रजनन स्वास्थ्य र अधिकार परियोजना (ASRHR) को दोस्रो चरणअन्तर्गत सन् २०२६ को वार्षिक समीक्षा कार्यक्रम बारबर्दिया नगरपालिकामा सम्पन्न भएको छ।
कोरियाली अन्तर्राष्ट्रिय सहयोग नियोग (KOICA) को आर्थिक सहयोग, प्लान इन्टरनेसनलको साझेदारी तथा राधाकृष्ण थारू जनसेवा केन्द्र (RKJS), गुलरिया–५, बर्दियाको कार्यान्वयनमा बारबर्दिया नगरपालिकासँग समन्वय र सहकार्य गरी सञ्चालित परियोजनाको वार्षिक समीक्षा कात्तिक १९ गते गरिएको हो।
कार्यक्रममा सन् २०२६ का गतिविधि, आर्थिक प्रगति, उपलब्धि र चुनौतीसँगै परियोजनाको तीनवर्षे अवधिमा भएका काम तथा आगामी योजनाबारे जानकारी गराइएको थियो।
परियोजनाको तीनवर्षे अवधिमा बारबर्दिया नगरपालिकाका २१ सामुदायिक विद्यालय र १९ सार्वजनिक स्वास्थ्य संस्थामा किशोरकिशोरीको स्वास्थ्य, शिक्षा तथा अधिकार संरक्षणसम्बन्धी विभिन्न कार्यक्रम सम्पन्न गरिएको जनाइएको छ।
परियोजनामार्फत विद्यालयमा बृहत् यौनिकता शिक्षा, शिक्षक तथा स्वास्थ्यकर्मीलाई तालिम, किशोरकिशोरीमैत्री स्वास्थ्य सेवा विस्तार, सूचना कक्ष स्थापना, अपाङ्गतामैत्री शौचालय तथा महिनावारी आराम कक्षजस्ता पूर्वाधार विकासका काम गरिएको कार्यक्रममा प्रस्तुत गरिएको थियो।
त्यसैगरी किशोरकिशोरीमैत्री स्वास्थ्य सेवा भवन निर्माण, स्वास्थ्य संस्थामा परामर्श सेवाको सुदृढीकरण, अभिभावक तथा समुदायमा सचेतना विस्तार र अन्तरपुस्ता संवादमार्फत किशोरकिशोरीको स्वास्थ्य तथा अधिकारप्रतिको बुझाइ अभिवृद्धि गर्ने प्रयास गरिएको छ।
कार्यक्रममा प्रस्तुत विवरणअनुसार विद्यालयमा बृहत् यौनिकता शिक्षाको पहुँच विस्तार, साथी शिक्षकको परिचालन, स्वास्थ्यकर्मीको क्षमता विकास तथा किशोरकिशोरीमैत्री स्वास्थ्य सेवाको मूल्याङ्कनजस्ता गतिविधिसमेत सञ्चालन गरिएका छन्।
सन् २०२६ को आर्थिक विवरणअनुसार परियोजनाका लागि विनियोजित ८६ लाख ७९ हजार ४५४ रुपैयाँमध्ये ८६ लाख ४२ हजार ४१९ रुपैयाँ खर्च भएको जानकारी गराइएको थियो।
कार्यक्रमका प्रमुख अतिथि एवं बारबर्दिया नगरपालिकाका नगरप्रमुख छविलाल थारुले नगरको शिक्षा, स्वास्थ्य तथा सामाजिक विकासका क्षेत्रमा कोइका, प्लान इन्टरनेसनल र राधाकृष्ण थारू जनसेवा केन्द्रलगायतका विभिन्न संस्थाहरूले नगरपालिकासँगको सहकार्यमा पुर्याएको योगदानको प्रशंसा गर्नुभयो। उहाँले परियोजनाअन्तर्गत भएका काम कागजमा मात्र सीमित नभई विद्यालय, स्वास्थ्य संस्था र समुदायमा प्रत्यक्ष देखिने गरी कार्यान्वयन भएको उल्लेख गर्दै यस्ता परिणाममुखी कार्यक्रमले नगरपालिकाको विकासमा महत्वपूर्ण सहयोग पुर्याएको बताउनुभयो। नगरपालिकाको आवश्यकता र नागरिकको हितलाई केन्द्रमा राखेर परिणाममुखी काम गर्ने सबै संघसंस्थासँग सहकार्य गर्न नगरपालिका सकारात्मक रहेको उहाँको भनाइ थियो।
साझेदारी र सहकार्यबाट सञ्चालित कार्यक्रमहरूको सकारात्मक परिणाम प्रत्यक्ष रूपमा देखिन थालेको उल्लेख गर्दै उहाँले साझेदार संस्थाहरूको सहयोगमा निर्माण भएका भौतिक पूर्वाधार तथा विकास गरिएका सेवा–सुविधाको संरक्षण, प्रभावकारी सञ्चालन र निरन्तरताको जिम्मेवारी नगरपालिकाले लिने प्रतिबद्धता व्यक्त गर्नुभएको थियो। साथै, प्राप्त उपलब्धिहरूको संस्थागत स्वामित्व ग्रहण गर्दै तिनलाई दीर्घकालीन रूपमा दिगो बनाइने बताउनुभएको थियो।
त्यसैगरी, नगर उपप्रमुख रत्न पाण्डेले विकास साझेदारहरूको सहकार्यमा सञ्चालित कार्यक्रमहरूले नगरपालिकाको सामाजिक विकास र सेवा प्रवाहमा महत्त्वपूर्ण टेवा पुर्याएको बताउनुभयो। जनप्रतिनिधिको कार्यकाल सीमित भए पनि सरकारमा जोसुकै आए पनि नागरिकको हित र नगरको समग्र विकाससँग जोडिएका यस्ता कार्यक्रमहरू निरन्तर सञ्चालन हुनुपर्ने आवश्यकता औँल्याउनुभयो।
नगरपालिकाका प्रमुख प्रशासकीय अधिकृत गौतम भण्डारीले परियोजनामार्फत हासिल भएका उपलब्धिहरूको सराहना गर्दै सहयोगी तथा साझेदार निकायहरूप्रति आभार व्यक्त गर्नुभयो। स्थानीय सरकार र विकास साझेदारबीचको आपसी समन्वय तथा सहकार्यले विकासका प्रयासलाई थप प्रभावकारी बनाउने विश्वाससमेत व्यक्त गर्नुभयो।
कार्यक्रमका सभाध्यक्ष एवं राधाकृष्ण थारू जनसेवा केन्द्रका कोषाध्यक्ष यज्ञराज पोखरेलले परियोजना सञ्चालनका क्रममा बारबर्दिया नगरपालिकाबाट प्राप्त सहयोग, समन्वय तथा सहज कार्य वातावरणप्रति आभार व्यक्त गर्नुभयो।
कार्यक्रमका सभाध्यक्ष एवं राधाकृष्ण थारू जनसेवा केन्द्रका कोषाध्यक्ष यज्ञराज पोखरेलले परियोजना सफलतापूर्वक सञ्चालन गर्न नगरपालिकाबाट प्राप्त साथ, सहयोग र अनुकूल कार्य वातावरणप्रति आभार व्यक्त गर्नुभयो। उहाँले समुदायका आवश्यकता र प्राथमिकतालाई केन्द्रमा राख्दै आगामी दिनमा पनि इमानदारी, जिम्मेवारी र प्रतिबद्धताका साथ विकासमूलक कार्यक्रमहरू अघि बढाउने बताउनुभयो। साथै, सम्भव भएसम्म परियोजनाको तेस्रो चरणसमेत सञ्चालन गरी हालसम्म हासिल भएका उपलब्धिहरूलाई थप विस्तार र दिगोपन दिने संस्थाको चाहना रहेको उल्लेख गर्नुभयो।
समीक्षा कार्यक्रममा परियोजनाका उपलब्धिसँगै कार्यान्वयनका क्रममा देखिएका चुनौती र तिनको समाधानका लागि अपनाइएका रणनीतिबारे पनि जानकारी गराइएको थियो। समुदायको सहभागिता, विद्यालय र स्वास्थ्य संस्थाबीचको समन्वय, स्थानीय सरकारको अपनत्व तथा सेवाको दिगोपनालाई आगामी दिनका महत्वपूर्ण प्राथमिकताका रूपमा प्रस्तुत गरिएको थियो।
किशोरकिशोरीको स्वास्थ्य र अधिकार संरक्षणमा भएका उपलब्धिलाई दीर्घकालीन रूपमा संस्थागत गर्न स्थानीय सरकार, समुदाय र विकास साझेदारबीचको निरन्तर सहकार्य आवश्यक रहेको सन्देशसहित कार्यक्रम सम्पन्न भएको हो। — रिपोर्टिङ नेपाल, बर्दिया
बिज्ञापन-YM-AD
समुदाय–प्रहरी साझेदारी अन्तर्गत अपराध नियन्त्रणका विषयमा कार्यक्रम सम्पन्न
१३ असोज २०८२ / बारबर्दिया – बारबर्दिया नगरपालिका–७ रम्मापुर स्थित करेलिया सामुदायिक वन कार्यालयको प्रांगणमा नेपाल प्रहरीले समुदाय–प्रहरी साझेदारी (Community–Police Partnership) कार्यक्रम सम्पन्न गरेको छ । कार्यक्रमको संयोजन तथा संचालन प्रहरी चौकी जयनगर इप्रकाका प्रहरी सहायक निरीक्षक जोरासिंह अधिकारले गरेका हुन् । उनले समुदाय र प्रहरीबीच आपसी विश्वास र सहकार्य भए मात्र सुरक्षित समाज निर्माण सम्भव हुने भन्दै चाडपर्वको बेला विशेष सतर्कता अपनाउनुपर्नेमा जोड दिए ।
सई अधिकारीका अनुसार चाडपर्वको रमाइलोको नाममा चोरी, लुटपाट, जुवातास, मदिरा सेवन, लागूपदार्थ दुरुपयोगजस्ता गतिविधि बढ्ने देखिन्छ । यस्ता अपराधलाई रोक्न समुदायकै सक्रिय भूमिका आवश्यक हुने उनको भनाइ थियो । उनले दशैं, तिहार जस्ता ठूला चाडपर्वलाई उदाहरण दिँदै भने, “प्रहरी मात्रले सबै अपराध नियन्त्रण गर्न सक्दैन । स्थानीय तह, समुदाय, विद्यालय र सामाजिक संस्थाहरूले प्रहरीसँग सहकार्य गरे मात्रै अपराधमुक्त र सुरक्षित समाज बनाउन सकिन्छ ।”
कार्यक्रममा सहभागीहरूमाझ चाडपर्वताका बेला देखिने सम्भावित अपराधका क्षेत्रमा विस्तृत जानकारी गराइएको थियो । प्रहरीका अनुसार, चोरी र लुटपाट मात्र नभई सवारी दुर्घटना, झैझगडा, कुटपिट, घरेलु हिंसा, महिलामाथि हुने हिंसा, जबर्जस्ती करणी जस्ता घटनाहरू पनि बढ्ने सम्भावना हुन्छ । यसरी अपराध बढ्ने सम्भावनाबारे जानकारी दिँदै सई अधिकारले सबैलाई सचेत रहन आह्वान गरे । उनले अपराध देखिए वा शंका लागे तत्काल प्रहरीलाई जानकारी दिन आग्रह गर्दै भने, “प्रहरीलाई ढिलो जानकारी गराइयो भने सामान्य घटना पनि ठूलो दुर्घटनामा परिणत हुन्छ ।”
कार्यक्रममा बालबालिका र किशोरकिशोरीलाई लक्षित गर्दै विशेष सन्देश दिइयो । प्रहरीका अनुसार, चाडपर्वमा रमाइलोको नाममा उनीहरू कुलतमा फस्ने, लागूपदार्थ सेवन गर्ने वा जुवातासतर्फ आकर्षित हुने सम्भावना बढी हुन्छ । त्यसैले अभिभावक र समुदायले उनीहरूलाई सुरक्षित राख्नुपर्छ ।
बालविवाह र बहुविवाहजस्ता अवैध प्रथाले समाजमा गहिरो समस्या ल्याउने भएकाले यसलाई रोक्न समुदायकै पहल अपरिहार्य हुने भनाइ पनि व्यक्त गरियो ।
सवारी साधनको अत्यधिक प्रयोग हुने भएकाले चाडपर्वमा दुर्घटनाको जोखिम बढ्ने तथ्य कार्यक्रममा उठाइयो । चालक र यात्रु दुवै सतर्क हुनुपर्ने भन्दै सई अधिकारले विशेष गरी मोटरसाइकल चालकलाई मादक पदार्थ सेवनपश्चात सवारी नचलाउन आग्रह गरे ।
उनले हेल्मेट र सिटबेल्ट प्रयोग नगर्दा धेरै दुर्घटनामा ज्यान गुमाउने अवस्था आएको तथ्य प्रस्तुत गर्दै सहभागीहरूलाई सचेत रहन आह्वान गरे ।
कार्यक्रममा सहभागीहरूले पनि अपराध नियन्त्रणमा प्रहरीलाई मात्र दोष नदिइ समुदायकै सक्रियता जरुरी हुने धारणा राखे । उनीहरूले कुनै पनि आपराधिक गतिविधि देखिएमा ढिला नगरी प्रहरीलाई जानकारी गराउने प्रतिबद्धता जनाए ।
सामाजिक संस्था र विद्यालयका प्रतिनिधिहरूले आफ्नो स्तरबाट सचेतना फैलाउने, टोलमा हुने विकृति र अपराध रोक्न प्रहरीलाई सहयोग गर्ने, बालबालिकालाई कुलतबाट जोगाउने र महिला हिंसा रोक्न प्रत्यक्ष पहल गर्ने संकल्प गरेका थिए ।
नेपाल प्रहरीले समुदायसँग सहकार्य गर्दै सञ्चालन गर्दै आएको “समुदाय–प्रहरी साझेदारी” अभियानले अपराध नियन्त्रण मात्र नभई शान्ति, सुरक्षा र सामाजिक विश्वास कायम गर्न दीर्घकालीन योगदान पुर्याउने अपेक्षा गरिएको छ ।
कार्यक्रममा सहभागी स्थानीय बासिन्दाले प्रहरीलाई मात्र अपराध नियन्त्रणको जिम्मा हालेर पन्छिन नमिल्ने भन्दै आफूहरूले पनि सचेत हुने अठोट व्यक्त गरे । उनीहरूले प्रहरी र समुदायबीच नियमित छलफल र सहकार्य भइरहने हो भने बारबर्दियालाई अपराधमुक्त क्षेत्र बनाउन सकिने विश्वास व्यक्त गर्दै कुनै पनि आपराधिक गतिविधि देखिएमा ढिला नगरी प्रहरीलाई जानकारी गराउने प्रतिबद्धता व्यक्त गरेका थिए ।
नेपाल प्रहरीले समुदायसँग सहकार्य गर्दै सञ्चालन गर्दै आएको “समुदाय–प्रहरी साझेदारी” अभियानले अपराध नियन्त्रण मात्र नभई शान्ति, सुरक्षा र सामाजिक विश्वास कायम गर्न दीर्घकालीन योगदान पुर्याउने अपेक्षा गरिएको छ ।
बिज्ञापन-YM-AD
बच्चा जन्माउने क्रममा आमाको मृत्यु : धर्मेश्वर अस्पतालले समयमै रिफर नगरेको परिवारको आरोप, प्राइम अस्पतालमा पुगेपछि मृत घोषणा
रिपोर्टिंङ नेपाल – २०८३ भदौ १८ गते मंगलबार
बच्चा जन्माउने क्रममा आमाको मृत्यु : धर्मेश्वर अस्पतालले समयमै रिफर नगरेको परिवारको आरोप, विराटनगर पुगेपछि मृत घोषणा
सप्तरी । कैलाश माझी
सप्तरीको सप्तकोशी नगरपालिका–११, भगनीकी २९ वर्षीया पुष्पा देवी खड्गाको प्रसूति उपचारका क्रममा मृत्यु भएपछि कञ्चनरूप नगरपालिका–१२ स्थित धर्मेश्वर अस्पतालको उपचार प्रक्रिया र बिरामीलाई गरिएको रिफरललाई लिएर गम्भीर प्रश्न उठेको छ।
भदौ १६ गते मंगलबार बिहान बच्चा जन्माउन धर्मेश्वर अस्पताल पुगेकी पुष्पाको शल्यक्रियापछि स्वास्थ्य अवस्था बिग्रिएको र राति मात्र उनलाई विराटनगरस्थित प्राइम अस्पतालमा रिफर गरिएको परिवारले जनाएको छ। परिवारका अनुसार प्राइम अस्पताल पुर्याउँदा चिकित्सकले पुष्पालाई मृत घोषणा गरेका थिए।
परिवारका अनुसार मंगलबार बिहान करिब २ बजे पेट दुखेपछि पुष्पालाई धर्मेश्वर अस्पताल लगिएको थियो। सामान्य प्रसूतिबाट बच्चा जन्माउन सम्भव नभएको भन्दै चिकित्सकले शल्यक्रिया गर्नुपर्ने बताएपछि उनको अप्रेसन गरिएको थियो।
परिवारको भनाइअनुसार बिहान करिब ४ बजे शल्यक्रिया सकिएको थियो। तर, शल्यक्रियापछि पनि पुष्पाको स्वास्थ्य अवस्था सामान्य नरहेको भन्दै परिवारले चिन्ता व्यक्त गरेको थियो।
यही अवस्थामा परिवारले अस्पतालको उपचार निर्णयमाथि गम्भीर प्रश्न उठाएको छ।
अवस्था गम्भीर थियो भने करिब ६ घण्टासम्म किन रिफर गरिएन ?
परिवारका अनुसार बिहान करिब ४ बजे शल्यक्रिया सकिएपछि राति करिब १० बजे मात्र पुष्पालाई थप उपचारका लागि विराटनगर रिफर गरिएको थियो।
यसबीचको करिब ६ घण्टाको अवधिमा बिरामीको अवस्था कस्तो थियो ?
यदि शल्यक्रियापछि बिरामीको अवस्था गम्भीर बन्दै गएको थियो भने समयमै उच्चस्तरीय उपचार सुविधा भएको अस्पतालमा रिफर किन गरिएन ?
यदि धर्मेश्वर अस्पतालमै आवश्यक उपचार सम्भव थियो भने राति करिब १० बजे आएर विराटनगर रिफर गर्नुपर्ने अवस्था किन सिर्जना भयो ?
र, यदि रिफर गर्नुपर्ने अवस्था पहिल्यै पहिचान भएको थियो भने बिरामीलाई घण्टौंसम्म अस्पतालमै राख्नुको चिकित्सकीय आधार के थियो ?
यी प्रश्नको जवाफ अब अस्पताल प्रशासन र उपचारमा संलग्न चिकित्सकबाट खोजिनुपर्ने देखिन्छ।
रिफर गरिएको अस्पतालले नै मृत घोषणा गरेको परिवारको भनाइ
परिवारका अनुसार धर्मेश्वर अस्पतालबाट राति करिब १० बजे प्राइम अस्पताल विराटनगरतर्फ रिफर गरिएकी पुष्पालाई त्यहाँ पुर्याउँदा चिकित्सकले मृत्यु भइसकेको जानकारी दिएका थिए।
यसले रिफर गर्ने समय र बिरामीको वास्तविक स्वास्थ्य अवस्थाबारे थप प्रश्न उठाएको छ।
बिरामीलाई रिफर गर्ने निर्णय लिनुअघि धर्मेश्वर अस्पतालले उनको स्वास्थ्य अवस्था कुन स्तरमा पुगेको मूल्यांकन गरेको थियो ? रिफर गर्नुअघि अस्पतालमै के–कस्ता उपचार तथा जीवनरक्षाका प्रयास गरिएका थिए ?
यी विषय मेडिकल अभिलेख, उपचार विवरण र रिफरल नोटबाट स्पष्ट हुनुपर्ने देखिन्छ।
शल्यक्रिया गर्ने चिकित्सकमाथि पनि प्रश्न
परिवारका अनुसार पुष्पाको शल्यक्रिया स्त्री तथा प्रसूति रोग विशेषज्ञ डा. वसन्त साहले गरेका थिए।
अब शल्यक्रियाका क्रममा के समस्या उत्पन्न भयो, शल्यक्रियापछि बिरामीको स्वास्थ्यमा के परिवर्तन आयो, त्यसको व्यवस्थापन कसरी गरियो र बिरामीलाई तत्काल अन्य अस्पतालमा लैजानुपर्ने अवस्था कहिले पहिचान भयो भन्ने विषय छानबिनको दायरामा आउनुपर्ने देखिन्छ।
तर, पुष्पाको मृत्यु चिकित्सकीय लापरवाहीकै कारण भएको हो भन्ने निष्कर्ष अनुसन्धान र प्रमाणबिना निकाल्न भने मिल्दैन।
नवजात शिशु बाँच्यो, आमाको काख गुम्यो
पुष्पाको शल्यक्रियाबाट नवजात शिशुको ज्यान जोगिए पनि आमाको भने मृत्यु भएको परिवारले जनाएको छ।
हाल नवजात शिशुलाई विराटनगरस्थित विराट नर्सिङ होममा गैर–आईसीयूमा राखेर उपचार भइरहेको परिवारको भनाइ छ। पुष्पाका दुई छोरा पनि छन्।
बच्चा जन्मिएसँगै घरमा खुसीको वातावरण बन्नुपर्ने समयमा परिवारमा भने शोक छाएको छ। नवजात शिशुले जन्मिएको केही समयमै आमाको काख गुमाएको छ भने उनका दुई छोराले समेत आमाको साथ गुमाएका छन्।
पोस्टमार्टम र मेडिकल रेकर्डबाट खुल्नुपर्ने वास्तविकता
पुष्पाको शव पोस्टमार्टमका लागि धरानस्थित बीपी कोइराला स्वास्थ्य विज्ञान प्रतिष्ठान लगिएको इलाका प्रहरी कार्यालय कञ्चनपुर, सप्तरीले जनाएको छ।
अब पोस्टमार्टम रिपोर्टसँगै धर्मेश्वर अस्पतालको मेडिकल रेकर्ड, शल्यक्रिया रिपोर्ट, परीक्षणका नतिजा, औषधि तथा उपचार विवरण र रिफरल कागजातसमेत अध्ययन गर्नुपर्ने देखिन्छ।
विशेषगरी शल्यक्रिया सकिएको समयदेखि रिफर गर्दासम्मको करिब ६ घण्टामा बिरामीको अवस्था कसरी परिवर्तन भयो र के–कस्ता उपचार गरियो भन्ने विषय घटनाको अनुसन्धानका लागि महत्वपूर्ण हुने देखिन्छ।
परिवारको माग : सत्यतथ्य सार्वजनिक गरियोस्
घटनापछि परिवार तथा स्थानीयवासीले पुष्पाको मृत्युको निष्पक्ष छानबिन गर्न माग गरेका छन्।
उनीहरूको माग छ—मृत्युको वास्तविक कारण पत्ता लगाइयोस्, उपचारको सम्पूर्ण प्रक्रिया छानबिन गरियोस् र यदि उपचारमा कुनै कमजोरी वा लापरवाही प्रमाणित भएमा सम्बन्धित पक्षलाई कानुनअनुसार कारबाही गरियोस्।
पुष्पाको मृत्यु स्वाभाविक चिकित्सकीय जटिलताका कारण भएको हो वा उपचार प्रक्रियामा भएको कुनै कमजोरीले भूमिका खेलेको हो भन्ने कुरा अनुसन्धानपछि मात्र स्पष्ट हुनेछ।
तर एउटा प्रश्न भने गम्भीर रूपमा उठेको छ—
शल्यक्रिया बिहान ४ बजे सकिएको अवस्थामा बिरामीलाई थप उपचार आवश्यक थियो भने राति १० बजेसम्म किन पर्खाइयो ?
रिफर गर्ने अवस्था पहिले नै देखिएको थियो भने समयमै किन रिफर गरिएन ?
अन्ततः विराटनगरको अस्पतालले बिरामीलाई मृत घोषणा गर्नुपर्ने अवस्था आउनुअघि धर्मेश्वर अस्पतालमा बिरामीलाई बचाउन के–कस्ता प्रयास गरिएका थिए ?
यी प्रश्नको जवाफ अब मेडिकल अभिलेख, पोस्टमार्टम रिपोर्ट र निष्पक्ष छानबिनबाट सार्वजनिक हुनुपर्ने देखिन्छ।
बिज्ञापन-YM-AD
समाजसेवी कालीराम थारुको स्मृतिमा शालिक अनावरण
१४ श्रावण २०८२, रिपोर्टिंग नेपाल ,बर्दिया — राजनीतिक, सामाजिक र सांस्कृतिक क्षेत्रमा अतुलनीय योगदान पुर्याएका समाजसेवी स्व. कालीराम थारुको सम्झनामा बारबर्दिया नगरपालिका–५ स्थित मगरागाडी चोकमा नागा पंचमी तथा गुरिया पर्वको अवसर पारि उहाँको शालिक अनावरण गरिएको छ।
नगरपालिकाको आयोजनामा आयोजित विशेष समारोहमा नगरप्रमुख छबिलाल थारुले शालिक अनावरण गर्दै स्व. थारुलाई “समर्पित र जनमुखी समाजसेवी”को रूपमा स्मरण गर्नुभयो। उहाँले भन्नुभयो, “कालीराम थारु कुनै पार्टी विशेषका प्रतिनिधि होइनन्, उनी सम्पूर्ण समाजका सेवक थिए। उहाँको योगदान थारु समुदायदेखि सम्पूर्ण बारबर्दिया नगरवासीका लागि प्रेरणाको स्रोत हो।”
यद्यपि शालिक निर्माण केही सामाजिक सञ्जालमा विवादको विषय बन्यो। आलोचकहरूले नेपाली कांग्रेसले स्थानीय निर्वाचन घोषणापत्रमा दल विशेषका नेताको नाममा शालिक नबनाउने उल्लेख गरेका थिए भन्ने विषय उठाइ समाजसेवी कालिरामको योगदान नबुझी हावाको भरमा मुर्ति बनाउनेकार्य लाई अतिरन्जित गरेका थिए । यसबारे नगरप्रमुख थारुले स्पष्ट पार्दै भन्नुभयो, “यो कुनै पार्टीको शालिक होइन। स्वर्गीय कालीराम थारु एक समाजसेवी हुनुहुन्थ्यो। उहाँको नेतृत्वमा बनाइएको कुलोबाट सयौं किसानले खेतमा सिँचाइ पाएका छन् , उहाको योगदानमा त्यसवेला खनिएको रम्मापुर जयनगर बाटोमा हजारौ जनता हिड्न पाएकाछन् , उहाले निर्माण गरेका स्कुलमा बिद्यार्थी पढिरहेका छन्, यस्ता धेरै योगदानहरु छन् कलिराम थारुको त्यसैले उहाँलाई संकुचित राजनीतिक दृष्टिले होइन, साझा योगदान दिने सामाजिक व्यक्तित्वका रूपमा हेर्नुपर्छ।”
कार्यक्रममा प्रमुख प्रशासकीय अधिकृत टिकानाथ गोसाईले शालिक निर्माणमा १४ लाख ३८ हजार २ सय रुपैयाँ लागत लागेको जानकारी दिनुभयो। शालिक १ सय ९७ किलो तौलको भए पनि सम्झौता १ सय ८० किलोमा भएकाले सोही आधारमा भुक्तानी गरिएको हो। स्तम्भ निर्माण र वरिपरिका सडक पिच कार्यका लागि १५ लाख बजेटमा १४ लाख ६१ हजारमा सम्झौता भई बाँकी कार्य सम्पन्न हुन बाँकी रहेकाले म्याद थप गरिएको बताइएको छ।
वि.सं. १९८४ साल चैत २८ गते जन्मिनु भएका स्व. थारुले वि.सं. २०६१ साल चैत ४ गते निधन हुनु अघि सम्म जनताको सेवा, राजनीतिक जागरण र भौतिक विकासमा निरन्तर योगदान दिनुभयो। २०१२ सालदेखि कुलापानी चौधरीमार्फत राजनीतिमा प्रवेश गरी तीनपटक मगरागाडी गाउँपञ्चायतको प्रधानपञ्च पदमा निर्वाचित भई जनताको सेवा गर्नुभएको थियो।
२०३७ सालको राष्ट्रिय पञ्चायत निर्वाचनमा ‘छाता’ चिन्ह लिएर उम्मेदवारी दिनुभएका थारुले शिक्षा, सिँचाइ, पुल, मन्दिर, बाँध, कुला, खानेपानी, सडकजस्ता पूर्वाधार निर्माणमा सक्रिय सहभागिता जनाउनुभएको थियो। पश्चिम नेपालको एक ऐतिहासिक धार्मिक स्थल ‘सदाशिव मन्दिर’ पनि उहाँकै नेतृत्व र लगानीमा निर्माण भएको हो।
साँस्कृतिक संरक्षणमा समेत उहाँले विशेष ध्यान दिनु भएको थियो। उहाँको पहलमा परम्परागत भेषभूषा, नाचगान, रीतिरिवाजहरू जोगाइएका थिए। दशैँलगायत चाडपर्वहरूमा उहाँको घरमा सामूहिक जमरा, टीका र सांस्कृतिक जमघट नियमित रूपमा हुने गर्थ्यो।
राजाबाट ‘तक्मा’ र ‘कदरपत्र’ प्राप्त गरेका थारु, बहुदलीय व्यवस्थाको पक्षमा जनमत संग्रहमा सक्रिय सहभागी रहनुभएको थियो।
बारबर्दिया नगरपालिका वडा नम्मर ५ का वडाध्यक्ष लाल बहादुर चौधरी सभाध्यक्ष रहनुभएको उक्त कार्यक्रममा नगर प्रमुख छबिलाल थारु प्रमुख अतिथि हुनुहुन्थ्यो भने विशेष अतिथिमा स्व. कलिराम थारुको धर्मपत्नी चीनकी थारु र प्रमुख प्रशासकीय अधिकृत टिकानाथ गोसाई रहनुभएको थियो l , राजनीतिक दल बाट प्रतिनिधित्व गर्दै नेपाली कांग्रेसक नगर सभापति सुरेन्द्र बोहोरा, नेकपा माओवादीका नगर अध्यक्ष सुदिन थारु , रास्ट्रीय स्वतन्त्र पार्टीका नगर अध्यक्ष सागर भट्टराई , राप्रपा नगर अध्यक्ष राम भरोसे थारु लगाएत विभिन्न वडाका वडा अध्यक्ष, बडघर समाजसेवी लगायतको उपस्थिति रहेको थियो l
कार्यक्रमका सभाध्यक्ष बारबर्दिया नगरपालिका–५ का वडाध्यक्ष लाल बहादुर थारुले स्व. कालीराम थारु सामाजिक, सांस्कृतिक र भौतिक विकासमा उल्लेखनीय योगदान पुर्याएका एक सच्चा समाजसेवी भएको उल्लेख गर्दै उहाँको सम्मानमा शालिक स्थापना गर्नु नगरपालिकाको सराहनीय पहल भएको बताउनुभयो।
शालिक निर्माणलाई लिएर सामाजिक सञ्जालमा उठेका केही आलोचनाप्रति प्रतिक्रिया दिँदै उहाँले भन्नुभयो, “कालीराम थारुजस्तो प्रेरणादायी व्यक्तित्वको जीवन र योगदानको गहिरो अध्ययन नगरी हचुवाको भरमा विरोध गर्नु दुर्भाग्यपूर्ण हो। यस्तो प्रतिक्रिया दिनेहरू कमजोर मानसिकता बोकेका सीमित व्यक्तिहरू मात्र हुन्।”
उहाँले कार्यक्रम समापनको घोषणा गर्दै कालीराम थारुलाई संकुचित राजनीतिक चश्माबाट नभई साझा सामाजिक योगदानको दृष्टिले हेर्नुपर्ने कुरामा जोड दिनुभयो। वडाध्यक्ष लाल बहादुर थारु वर्तमानमा नेकपा एमालेबाट निर्वाचित वडाध्यक्ष हुनुहुन्छ।
बिज्ञापन-YM-AD
ढकैला गाउँमै स्वास्थ्य सेवा – शहरी स्वास्थ्य क्लिनिकको उद्घाटन
२६ आश्विन २०८२, रिपोर्टिंग नेपाल ,बारबर्दिया | बारबर्दिया नगरपालिका–९ ढकैला गाउँमा शहरी स्वास्थ्य क्लिनिकको भव्य रूपमा शुभारम्भ गरिएको छ। आइतबारदेखि सेवा सुरु भएको यो क्लिनिक गाउँकै बासिन्दालाई सहज र गुणस्तरीय स्वास्थ्य सेवा उपलब्ध गराउने उद्देश्यले स्थापना गरिएको हो।
बर्दिया राष्ट्रिय निकुञ्जको मध्यवर्ती वन क्षेत्रमा पर्ने ढकैला गाउँ राजमार्गदेखि करिब ५ किलोमिटर टाढा अवस्थित छ। लामो समयदेखि गाउँमा स्वास्थ्य संस्थाको अभावका कारण स्थानीयवासीहरूलाई सामान्य उपचारका लागि पनि पाँचदेखि छ किलोमिटर जंगल पार गर्दै हिंड्नुपर्ने बाध्यता थियो। आजदेखि भने ढकैला गाउँका बासिन्दाले आफ्नो घरआँगन नजिकै स्वास्थ्य सेवा पाउने भएका छन्, जसले उनीहरूको दैनन्दिन जीवनयापनमा ठूलो सहजता ल्याउने अपेक्षा गरिएको छ ।
क्लिनिक सञ्चालनका लागि करिब ३७ लाख रुपैयाँ लागतमा नयाँ भवन निर्माण गरिएको हो। भवन निर्माणका लागि स्व. दमन ध्वज क्षेत्रीको सम्झनामा उनकी श्रीमती सपना क्षेत्री र छोराहरूले १६९.३१ वर्गमिटर जग्गा दान गरेका थिए। समाजप्रति उच्च योगदान पुर्याउने उक्त परिवारलाई उद्घाटन समारोहमा विशेष सम्मान गरिएको थियो। त्यस्तै, समयमै गुणस्तरीय काम सम्पन्न गर्ने निर्माण व्यवसायीलाई पनि प्रशंसा पत्र प्रदान गरिएको थियो।
उद्घाटन कार्यक्रममा प्रमुख अतिथि बारबर्दिया नगरप्रमुख छबिलाल थारूले ढकैला शहरी स्वास्थ्य क्लिनिकलाई स्थानीय जनताको स्वास्थ्य सुधारतर्फको ऐतिहासिक कदमका रूपमा व्याख्या गर्नुभयो । उहाँले स्वास्थ्य सेवा प्राप्ति कुनै विशेष वर्गको सुविधा होइन, सबै नागरिकको मौलिक अधिकार भएको उल्लेख गर्दै क्लिनिक स्थापना मार्फत गाउँमा नयाँ युगको सुरुवात भएको बताउनुभयो।
नगरप्रमुख थारूले भन्नुभयो ,
“स्वास्थ्य सबैको अधिकार हो। आज हामीले ढकैला गाउँमा स्थापना गरेको यो शहरी स्वास्थ्य क्लिनिकले टाढाटाढा स्वास्थ्य उपचारका लागि हिँड्नुपर्ने बाध्यता अन्त्य गरेको छ। अब गाउँकै आँगनमा उपचार उपलब्ध हुनेछ। यस संस्थाले केवल उपचार दिने मात्र होइन, स्थानीय बासिन्दामा स्वास्थ्यबारे सचेतना फैलाउने, रोग नलाग्ने जीवनशैली अपनाउन प्रेरित गर्ने, र समुदायलाई नियमित स्वास्थ्य परीक्षणतर्फ उन्मुख गराउने काम पनि गर्नेछ। बारबर्दिया नगरपालिकाले स्वास्थ्य र शिक्षालाई प्रमुख प्राथमिकतामा राखेको छ। रोग लागेको बेलामा मात्र उपचार होइन, रोग नै नलागोस् भनेर समुदायलाई तयार पार्नु आजको आवश्यकता हो। यसतर्फ नगरपालिका जिम्मेवार तरिकाले काम गर्दै आएको छ, र ढकैला क्लिनिक यस यात्राको एउटा महत्वपूर्ण माइलस्टोन हो।”
नगरप्रमुखले स्थानीय जनताको सक्रिय सहयोग, जग्गा दान गर्ने परिवारको योगदान र निर्माण कम्पनीको समयमै सम्पन्न गरिएको कामप्रति विशेष धन्यवाद व्यक्त गर्दै आगामी दिनमा यस क्लिनिकलाई थप सुदृढ, जनमैत्री र आधुनिक प्रविधियुक्त स्वास्थ्य केन्द्रका रूपमा विकास गरिने प्रतिबद्धता जनाउनुभयो।
प्रमुख प्रशासकीय अधिकृत गौतम भण्डारीले हाल समाजमा नसर्ने रोगहरू तीव्र रूपमा फैलिइरहेको बताउँदै जीवनशैलीमा सुधार, नियमित स्वास्थ्य परीक्षण र सचेतनामा जोड दिनुपर्नेमा बल दिनुभयो। उहाँले बालबालिकामा कुपोषण, किशोरीहरूमा रक्तअल्पता, र बालविवाहजस्ता समस्याले विकासका सूचकहरूमा नकारात्मक असर पारिरहेको जनाउँदै पालिका, विद्यालय, अभिभावक र समुदाय सबै एकजुट भएर काम गर्नुपर्नेमा जोड दिनुभयो।
स्वास्थ्य शाखा प्रमुख गोविन्द पौडेलले ढकैला गाउँका बासिन्दाका लागि विशेषरूपमा लक्षित गरी यो क्लिनिक सञ्चालनमा ल्याइएको बताउनुभयो। हाल स्थायी दरबन्दी नभए पनि पालिकाले अस्थायी रूपमा स्वास्थ्य सेवा सुरु गरेको र निकट भविष्यमै स्थायी स्वास्थ्यकर्मीको दरबन्दी सुनिश्चित गरी यो क्लिनिकलाई नियमित, सुदृढ र दिगो स्वास्थ्य केन्द्रका रूपमा विकास गरिने उहाँको भनाइ थियो।
क्लिनिक सञ्चालनसँगै ढकैला गाउँका बासिन्दाहरूमा खुसीयाली छाएको छ। स्थानीयवासीहरूले अब आफ्नो गाउँमै आधारभूत स्वास्थ्य सेवा पाउने अवसर प्राप्त भएको भन्दै बारबर्दिया नगरपालिका र वडा कार्यालयप्रति आभार प्रकट गरे। स्थानीय मनिषा भारतीले भनिन्,
“पहिले सानो उपचारका लागि पनि पाँच–छ किलोमिटर जंगल पार गरेर जानुपर्थ्यो। राति बिरामी परे झन् समस्या हुन्थ्यो। अब गाउँमै स्वास्थ्य सेवा पाउँदा निकै राहत मिलेको छ।”
कार्यक्रमका अध्यक्ष तथा वडा नं. ९ का अध्यक्ष देवेन्द्र कुमार विष्टले यो क्लिनिक गाउँवासीकै सहयोग, दान, र पालिकाको पहलबाट सम्भव भएको उल्लेख गर्दै सबैप्रति धन्यवाद व्यक्त गर्नुभयो । उहाँले गाउँमा स्वास्थ्य सेवा विस्तार गर्न यो सुरुवातमात्र भएको र आगामी दिनमा थप सुविधा थप्दै जाने प्रतिबद्धता जनाउनुभयो।
कार्यक्रममा नगरप्रवक्ता तथा वडा नं. ४ का अध्यक्ष सिताराम योगी, सामाजिक विकास समितिकी संयोजक श्यामकुमारी चौधरी, वडा नम्मर ८ का अध्यक्ष्य नर बहादुर चन्द लगाएत जनप्रतिनिधि, स्थानीय अगुवाहरू, स्वास्थ्यकर्मी, शिक्षक तथा समुदायका दर्जनौँ स्थानीयवासीहरूको उल्लेखनीय उपस्थिति थियो। उत्साहपूर्ण वातावरणमा सम्पन्न कार्यक्रमले गाउँमा स्वास्थ्य सेवाप्रतिको नयाँ आशा र भरोसा जगाएको छ।
बिज्ञापन-YM-AD
स्वास्थ्य मूल्याङ्कनमा बारबर्दिया अब्बल, ७८.५३ अंकसहित पहिलो
बर्दिया, २०८३ भाद्र २४, बुधबार । रिपोर्टिङ नेपाल
स्वास्थ्य क्षेत्रमा गरिएको वार्षिक मूल्याङ्कनमा बारबर्दिया नगरपालिका बर्दियाका आठ स्थानीय तहमध्ये उत्कृष्ट ठहरिएको छ। स्वास्थ्य कार्यालय बर्दियाले निर्धारित स्वास्थ्य सूचकका आधारमा गरेको मूल्याङ्कनमा बारबर्दियाले ७८.५३ अंक प्राप्त गर्दै पहिलो स्थान हासिल गरेको हो।
नगर अस्पतालमै आँखा उपचार सेवा सञ्चालनमा ल्याउने बर्दियाकै पहिलो पालिकाको रूपमा समेत पहिचान बनाएको बारबर्दियाले मूल्याङ्कनमा आफूलाई अब्बल सावित गर्न सफल भएको छ भने बढैयाताल गाउँपालिका ७६.९३ अंकसहित दोस्रो र गेरुवा गाउँपालिका ७६.७६ अंकसहित तेस्रो भएका छन्।
स्वास्थ्य कार्यालय बर्दियाले सार्वजनिक गरेको नतिजाअनुसार बाँसगढी नगरपालिका चौथो, मधुवन नगरपालिका पाँचौँ, गुलरिया नगरपालिका छैटौँ, राजापुर नगरपालिका सातौँ र ठाकुरबाबा नगरपालिका आठौँ स्थानमा रहेका छन्।
आर्थिक वर्ष २०८२/८३ मा स्वास्थ्य क्षेत्रमा सञ्चालन भएका कार्यक्रम तथा गतिविधिको वार्षिक समीक्षा र आगामी योजना तर्जुमा कार्यक्रममा स्थानीय तहहरूको मूल्याङ्कन नतिजा सार्वजनिक गरिएको हो।
स्वास्थ्य कार्यालय बर्दियाका प्रमुख उमेश गौतमले निर्धारित सूचकका आधारमा स्थानीय तहहरूको मूल्याङ्कन गरिएको बताउनुभयो। उहाँका अनुसार अंकका आधारमा पहिलो, दोस्रो र तेस्रो स्थान निर्धारण भए पनि जिल्लाका सबै स्थानीय तहले स्वास्थ्य क्षेत्रमा राम्रो काम गरिरहेका छन्।
मूल्याङ्कनमा समेटिएका सूचकबाहेक पनि स्थानीय स्वास्थ्य शाखाहरूले समुदायमा सकारात्मक प्रभाव पार्ने विभिन्न काम गरिरहेको गौतमले बताउनुभयो।
उहाँका अनुसार सबैभन्दा कम अंक प्राप्त गर्ने स्थानीय तहले समेत ७२.२९ अंक हासिल गरेको छ। अन्य जिल्ला तथा स्थानीय तहको अवस्थासँग तुलना गर्दा बर्दियाको समग्र स्वास्थ्य क्षेत्रको प्रदर्शन राम्रो रहेको उहाँको भनाइ छ।
स्वास्थ्य मूल्याङ्कनमा उत्कृष्ट भएका पहिलो, दोस्रो र तेस्रो स्थानका स्थानीय तहलाई सम्मान गरिएको छ। लुम्बिनी प्रदेशका स्वास्थ्य मन्त्री दीपेन्द्रकुमार पुनले प्रमाणपत्र प्रदान गर्दै दोसल्ला ओढाएर सम्मान गर्नुभएको हो।
स्थानीय तहको स्वास्थ्य सेवा, कार्यक्रम कार्यान्वयन र सूचकगत प्रगतिको नियमित मूल्याङ्कनले आगामी दिनमा स्वास्थ्य सेवा अझ प्रभावकारी बनाउन सहयोग पुग्ने अपेक्षा गरिएको छ।
बिज्ञापन-YM-AD
अपूरणीय क्षति : बाँसगढीका कुशल व्यवसायी तथा लोकप्रिय नेता विपिन पौडेल अब हामीबीच रहेनन्
१५ श्रावण २०८२, रिपोर्टिंग नेपाल ,बर्दिया — राष्ट्रिय स्वतन्त्र पार्टी (रास्वपा) बर्दिया जिल्ला सभापति तथा सफल व्यवसायी विपिन पौडेलको सिंगापुरमा निधन भएको छ।
पार्टीका अनुसार पौडेल व्यक्तिगत भ्रमणको क्रममा सिंगापुर गएका थिए। त्यही क्रममा बिरामी परेका उनले होटलमै ज्यान गुमाएका हुन्।
रास्वपा लुम्बिनी प्रदेश अध्यक्ष देवराज पाठकले जानकारी दिँदै भने, “उहाँ साउन १ गते सिंगापुर जानुभएको थियो। आज साउन १५ गते फर्कने टिकट थियो। दुर्भाग्यवश उतै बिरामी भइ १३ गते होटलमै निधन भएको खबर प्राप्त भएको छ।”
४६ वर्षीय पौडेल बर्दियाको बाँसगढीमा स्थापित एक व्यवसायी तथा समाजसेवी थिए। उनी रास्वपामा प्रदेश सदस्य, जिल्ला संयोजक हुँदै जिल्ला सभापतिको जिम्मेवारीमा रहेर सक्रिय भूमिका निर्वाह गर्दै आएका थिए।
पार्टीका नेताहरूले पौडेलको निधनलाई अपूरणीय क्षति भनेका छन्।
शव नेपाल ल्याउन आवश्यक कागजी प्रक्रिया तथा कानुनी औपचारिकता पूरा गरिनु पर्ने भएकाले केही समय लाग्ने जानकारी प्राप्त भएको छ।
ReportingNepal.com परिवार स्व. पौडेलप्रति हार्दिक श्रद्धाञ्जली अर्पण गर्दै शोकसन्तप्त परिवारप्रति गहिरो समवेदना प्रकट गर्दछ।
बिज्ञापन-YM-AD
