१९ मंसिर २०८२ रिपोर्टिङ नेपाल सम्बाददाता , मिति २०८२ मंसिर २० गते, शनिबारका दिन नेपालगञ्ज उप–महानगरपालिका–१० मा योग समिति नेपालले आफ्नै शाखा स्वरूप ५५ औँ सिद्धार्थ टोल योग केन्द्रको भव्य उद्घाटन गरेको छ। कार्यक्रमको अध्यक्षता योग समिति नेपालका परिकल्पनाकार तथा अध्यक्ष योग गुरु आयुर्वेचार्य श्रदय गिरिराजले गर्नुभयो भने, प्रमुख अतिथिका रूपमा अधिवक्ता प्रलाद बहादुर कार्की उपस्थित हुनुहुन्थ्यो। कार्यक्रममा वरिष्ठ उपाध्यक्ष निर्मला शाह, सचिव तथा कार्यक्रम सञ्चालक चिरञ्जीवी ज्ञवाली, योग प्रशिक्षक जानकी ज्ञवाली, अनिता श्रेष्ठ, भुमा पाण्डे लगायत सचिवालय तथा स्थानीय प्रतिनिधिहरूको उल्लेखनीय उपस्थिति थियो।
उक्त अवसरमा योग गुरु गिरिराजले ५५औँ योग केन्द्रको स्थापना तथा व्यवस्थापन समिति गठन भएको दिनलाई ऐतिहासिक भनेर उल्लेख गर्दै, उपस्थित सम्पूर्ण योग अभियन्ताहरूप्रति शुभकामना र आशीर्वाद व्यक्त गर्नुभयो। उहाँका अनुसार, नव–गठित समिति केवल संगठनात्मक संरचना मात्र नभई योगलाई घर–घरमा पुर्याउने, समाजलाई स्वस्थ, सजग र अनुशासित बनाउने, र तन–मन–आत्मालाई एकाकार गर्दै मानवताको सेवा गर्ने सामूहिक संकल्पको प्रतीक हो। समाजमा परिवर्तन शब्दले नभई अभ्यासले हुने बताउँदै उहाँले “म पनि योग गर्छु, म पनि समाजलाई केही दिन्छु, म पनि सकारात्मक परिवर्तन ल्याउन लाग्छु” भन्ने प्रतिज्ञा सबैले गर्नुपर्नेमा विशेष जोड दिनुभयो।
कार्यक्रमकै क्रममा ५५औँ सिद्धार्थ टोल योग केन्द्रको व्यवस्थापन समिति सार्वजनिक गरियो, जसको नेतृत्व भागिरथी पाण्डे (भुमा पान्डे) ले प्रमुख संयोजकका रूपमा सम्हाल्नेछिन्। समिति सञ्चालन तथा समन्वयमा चन्द्रा केसी (संयोजक), लक्ष्मी उप्रेती (सह–संयोजक), स्मृति घिमिरे (उप–संयोजक),सरिता ज्ञवाली लगायत सक्रिय सदस्यहरू सरिता ज्ञवाली, पुस्प राज पौडेल, भरत पान्डे, रितिक शाही, मनोज पान्डे, सीता उप्रेती र पवन ठाकुर रहनेछन्। केन्द्रको दीर्घकालीन योजनालाई रणनीतिक रूपमा अगाडि बढाउन अनिता कुमारी श्रेष्ठ, युवराज शर्मा, प्रलाद बहादुर कार्की, चम्पा लाल बोथरा, डा. गोपाल श्रेष्ठ, डा. पियुष कनोडिया, डा. अनिल कुमार चौधरी, डा. तुषार शाह, भानुभक्त पाण्डे र शक्ति बल्लभ आचार्य सल्लाहकारको भूमिकामा रहनेछन्।
वक्ताहरूले ५५औँ योग केन्द्रले नियमित योग अभ्यासमार्फत समुदायमा स्वास्थ्य, मानसिक सन्तुलन, अनुशासन र सकारात्मक सोच विस्तार गर्ने विश्वास व्यक्त गरे। योग गुरु गिरिराजले नव–निर्वाचित पदाधिकारीहरूलाई सफल कार्यकालका लागि बधाई दिँदै, केन्द्रलाई अझ मजबुत र प्रभावकारी बनाइ लैजाने नेतृत्व क्षमताप्रति पूरा विश्वास व्यक्त गर्नुभयो। कार्यक्रम जय योग, जय मानवता नारासहित सम्पन्न भएको थियो।
