बारबर्दिया, जेठ २२, २०८२ — विश्व वातावरण दिवसको अवसरमा बारबर्दिया नगरपालिका अन्तर्गत रहेको नगर अस्पताल परिसरमा विशेष वातावरणीय कार्यक्रम आयोजना गर्दै मोरिंगा (सितल चिनी) को बिरुवा रोपिएको छ। स्वास्थ्य सेवा र वातावरण संरक्षणबीचको सम्बन्धलाई उजागर गर्ने उद्देश्यले गरिएको सो कार्यक्रमले अस्पतालको वातावरणलाई हरियाली बनाउने र समुदायमा हरित सन्देश फैलाउने लक्ष्य राखेको थियो।
कार्यक्रममा अस्पतालमा कार्यरत मेडिकल अधिकृत डा. माधव पन्त र डा. जितेन्द्र यादव, वरिष्ठ अहेब तुलसी पोखरेल, ल्याब असिस्टेन्ट आइतवारी चौधरी, फार्मेसी सहायक विनोद कुमार देमनदौरा , निर्मल थारू लगायत अस्पतालका अन्य कर्मचारीहरूको सक्रिय सहभागिता रहेको थियो। साथै जयनगर रेडक्रस उपशाखाका अध्यक्ष श्रीराम चौधरीले पनि बिरुवा रोपणमा सहभागिता जनाएका थिए।
मोरिंगा बिरुवा बहुपयोगी औषधीय गुणले भरिपूर्ण मानिन्छ, जसले पोषणमा टेवा पुर्याउने मात्र होइन, वातावरणीय सन्तुलनमा पनि योगदान दिन्छ। यस प्रकारका बिरुवाको प्रवर्द्धनले स्वास्थ्य र वातावरण दुवै क्षेत्रमा सकारात्मक प्रभाव पार्ने अपेक्षा गरिएको छ।
उक्त कार्यक्रमका लागि आवश्यक बिरुवाको व्यवस्थापन नगर अस्पतालका अध्यक्ष तिर्थराज पौडेलले गर्नुभएको थियो। अस्पताल परिवारको समन्वयमा सम्पन्न भएको यस कार्यक्रमले हरित सोच र वातावरणीय जिम्मेवारीप्रति जनचेतना फैलाउने कार्यमा सघाउ पुर्याएको छ। सहभागीहरूले यस्ता अभियानलाई आगामी दिनहरूमा अझ व्यापक बनाउने प्रतिबद्धता व्यक्त गरेका छन्।
