नेपालका विभिन्न विधा र विषयका विश्वसनीय ताजा समाचारहरू, घटनाहरू, अपडेटहरू र जनचासोका विषयहरूलाई एकै ठाउँमा समेट्ने हाम्रो विशेष श्रेणी। यहाँ तपाईंले सामाजिक, राजनीतिक, आर्थिक र स्थानीय सबै खाले खबरहरू सहज रूपमा पाउन सक्नुहुन्छ।
१२ कार्तिक २०८०, काठमाडौँ | पिडित भारती मान्धर को श्रीमान चेतन मान्धर को २०७२ असार मा हत्या भयको थियो । रास्ट्रपति रामचन्द्र पौडेलले चेतन मानन्धरको हत्या अभियोगमा जेल परेका रिगल भनेर चिनिने योगराज ढकाललाई संबिधान दिवसको दिन असोज ०३ गते आम माफी दियका थिए ।
आफ्नो श्रीमान चेतन मानन्धरको हत्याको आरोपितले आम माफी पाएको बिरोधमा भारती मानन्धरले दशैं सकिए लगतै आज बाट पुन : रिले अनसन शुरु गरेकी छिन ।
बारबर्दिया (बर्दिया), कात्तिक २५ ।
बारबर्दिया नगरपालिका–७, रम्मापुरस्थित श्री जनता माध्यमिक विद्यालयमा आज एक विशेष समारोहका बीच पाँचौँ नगरस्तरीय राष्ट्रपति रनिङ शिल्ड खेलकुद प्रतियोगिता–२०८२ सुरु गरिएको छ। उक्त प्रतियोगिताको उद्घाटन प्रदेश सरकारका सामाजिक विकासमन्त्री जन्मजय तिमिल्सिनाले गर्नुभयो।
उद्घाटन समारोहलाई सम्बोधन गर्दै मन्त्री तिमिल्सिनाले खेलकुद राष्ट्र र राष्ट्रियताको पहिचानसँग जोडिएको महत्वपूर्ण क्षेत्र भएको बताउनुभयो। उहाँले खेलकुदले युवा पुस्तामा अनुशासन, लगनशीलता र आत्मविश्वासको विकास गराउने उल्लेख गर्दै समाजका किसान, मजदुरदेखि भुईँतहका जनताको आवाज माथिसम्म पुर्याउने जिम्मेवारी जनप्रतिनिधिहरूको नै भएको बताउनुभयो।
“जनताले गरेको विश्वासलाई मैले कहिल्यै विश्वासघात गर्न सक्दिन। म जनताको सेवकका रूपमा काम गरिरहेको छु,”
— जन्मजय तिमिल्सिना, सामाजिक विकासमन्त्री
उहाँले शिक्षा र खेलकुद दुवैलाई प्राथमिकतामा राखेर अघि बढिरहेको बताउँदै विद्यार्थी खेलाडीहरूलाई अनुशासन र मर्यादामा रही देश र समुदायको नाम उज्यालो पार्ने शुभकामना दिनुभयो।
‘विद्यालयबाटै राष्ट्रिय खेलाडी जन्मिन्छ’ — प्रमुख जिल्ला अधिकारी हमाल
कार्यक्रमका विशेष अतिथि बर्दिया जिल्लाका प्रमुख जिल्ला अधिकारी गोगन बहादुर हमालले खेलकुदले केवल खेलाडी मात्र होइन, राष्ट्र र राष्ट्रिय पहिचानलाई पनि चिनाउने माध्यम भएको बताउनुभयो।
उहाँले विद्यालयस्तरमै यस्ता प्रतियोगिताले भावी राष्ट्रिय खेलाडी उत्पादन गर्ने आधार तयार गर्ने उल्लेख गर्दै भन्नुभयो,
“पहिला विद्यालयहरूमा ‘वीरेन्द्र रनिङ शिल्ड’को रूपमा यस्ता प्रतियोगिता सञ्चालन हुन्थ्यो, अहिले ‘राष्ट्रपति रनिङ शिल्ड’को रूपमा निरन्तरता पाइरहेको छ। यस्ता कार्यक्रमहरू नियमित रूपमा भैरहनु आवश्यक छ।”
‘जितभन्दा ठूलो अनुशासन र मर्यादा हो’ — नगरप्रमुख थारु
कार्यक्रमका सभाध्यक्ष तथा बारबर्दिया नगरपालिकाका नगरप्रमुख छबिलाल थारुले विद्यालयस्तरका यस्ता प्रतियोगिताले विद्यार्थीहरूको समग्र व्यक्तित्व विकासमा ठूलो योगदान पुर्याउने विश्वास व्यक्त गर्नुभयो। उहाँले विद्यार्थी खेलाडीहरूलाई जितभन्दा बढी अनुशासन, सहयोग र मर्यादामा ध्यान दिन आग्रह गर्दै प्रतियोगिता सफल बनाउन सहयोग गर्ने सम्पूर्ण पक्षप्रति आभार प्रकट गर्नुभयो।
समारोहमा विद्यार्थीहरूले आकर्षक मार्चपास, मार्सल आर्टको प्रदर्शन, क्लबले सांस्कृतिक थारु गीत र स्थानीय तथा राष्ट्रिय लोकप्रिय कलाकार कमल बिसी माल्दाइले आफ्प्रनो कला प्रस्तुत गरेका थिए।
१६ विद्यालय सहभागी, खेलकुद कार्यक्रम कार्तिक २९ सम्म
बारबर्दिया नगरपालिकाको आयोजनामा र जनता माध्यमिक विद्यालय, रम्मापुरको संयोजनमा सञ्चालन भइरहेको यस वर्षको राष्ट्रपति रनिङ शिल्ड प्रतियोगितामा १६ वटा माध्यमिक विद्यालयका विद्यार्थीहरू सहभागी भएका छन्।
पहिलो दिन ८ सय मिटर दौड प्रतियोगिता सम्पन्न गरिएको छ भने भोलिदेखि भलिबल, कबड्डी, हाईजम्प, लङजम्प, सटपुट लगायतका खेलहरू सञ्चालन हुने जनाइएको छ। प्रतियोगिता कात्तिक २९ गतेसम्म सञ्चालन हुनेछ।
कार्यक्रममा प्रमुख जिल्ला अधिकारी, सामाजिक विकासमन्त्री, सुरक्षा निकायका प्रतिनिधि, राजनीतिक दलका सदस्य, शिक्षक, बुद्धिजीवी, पत्रकार तथा स्थानीय समुदायको उल्लेखनीय उपस्थिति थियो। उद्घाटन समारोह रंगीन झाँकी, विद्यार्थीहरूको जोशपूर्ण सहभागिता र खेलकुदमय वातावरणले भरिएको थियो।
कोहलपुर, २८ वैशाख, २०८२— आज करिब ५ बजे आएको तेज हावाहुरीका कारण बाँके जिल्लाको कोहलपुर नगरपालिका–२ स्थित आनन्दनगर क्षेत्रमा विद्युत संरचनामा क्षति पुगेको छ। सीटीभीटी कर्नरको पूर्व साइडमा रुख ढल्दा त्यसको चपेटामा परेर १ वटा ट्रान्सफर्मरसहित ७ वटा विद्युत पोल ढलेका छन्।
यस घटनाले पुरै क्षेत्रको विद्युत आपूर्ति पूर्णरूपमा अवरुद्ध भएको छ। स्थानीयवासीहरू आज अन्धकारमा बस्न बाध्य भएका छन् भने घरायसी कामकाज, विद्यार्थीहरूको पठनपाठन जस्ता दैनिक सेवा प्रभावित भएका छन्।
घटनाको जानकारी पाएलगत्तै कोहलपुर नगरपालिका–२ का वडा अध्यक्ष हरि कठायतले घटनास्थल पुगेर स्थलगत वस्तुस्थिति बुझी नेपाल विद्युत प्राधिकरणलगायत सम्बन्धित निकायहरूको ध्यानाकर्षण गराई यथाशीघ्र मर्मत कार्य अगाडि बढाउन आग्रह गरेकाछन ।
स्थानीय बासिन्दाका अनुसार हावाहुरी निकै तेज थियो जसका कारण रुख ढल्न पुग्यो र रुखले विद्युत पोल र ट्रान्सफर्मरमा ठुलो क्षति पुर्याए। यसबाट सो क्षेत्रका कैयौ घरधुरी प्रभावित भएका छन् ।
मर्मत कार्य भोलि २९ गते देखि सुरु हुने जानकारी प्राप्त भएको छ पहिलो चरणमा पोल र ट्रान्सफर्मर प्रतिस्थापन गरिनेछ भने दोस्रो चरणमा लाइन विस्तार गरी विद्युत आपूर्ति पुनः सञ्चालन गरिने बताइएको छ।
१७ असार २०८२, स्यारोन रेग्मी,बर्दिया — बढैयाताल गाउँपालिका–९ मा अवस्थित श्री जय कालिका माध्यमिक विद्यालयले असार १५ लाई धान दिवसका रूपमा विशेष कार्यक्रमसहित मनाएको छ। ‘आफै कमाउ, आफै पढौं’ भन्ने मूल नाराका साथ विद्यालयले आफ्नै खेतमा धान रोपेर धान दिवसको विशेषता झल्काएको छ।
कार्यक्रममा गाउँपालिका प्रमुख श्री हिमालय त्रिपाठी प्रमुख अतिथिका रूपमा सहभागी भएका थिए । उपप्रमुख लक्ष्मी अधिकारी, प्रमुख प्रशासकीय अधिकृत नारायणराज त्रिपाठी तथा कृषि शाखा प्रमुख दीपेन्द्र श्रीवास्तव विशिष्ट अतिथिका रूपमा उपस्थित थिए। साथै विद्यालयका शिक्षक, अभिभावक, तथा स्थानीय बासिन्दाहरूको उल्लेखनीय सहभागिता रहेको थियो।
असार १५ लाई राष्ट्रिय धान दिवसको रूपमा मनाइने परम्परालाई समेट्दै विद्यालयले यस वर्षको दिवसलाई कृषि तथा व्यवसायिक धार अन्तर्गत अध्ययनरत विद्यार्थीहरूलाई व्यवहारिक सिकाइसँग जोड्ने उद्देश्य राखेको छ। धान रोपाइँका क्रममा प्रमुख अतिथि तथा विशिष्ट अतिथिहरू आफैँ खेतमा उत्रिएर विद्यार्थी र अभिभावकसँगै रोपाइँ कार्यमा सहभागी भए।
विद्यालयले आफ्नै जग्गामा उत्पादन गरिने धानको आम्दानी विद्यार्थीहरूको शैक्षिक खर्चमा प्रयोग गरिने जानकारी दिएको छ। यस कार्यले विद्यार्थीहरूमा श्रमको मूल्य, आत्मनिर्भरता र कृषि व्यवसायप्रतिको रुचि बढाउने विश्वास गरिएको छ।
विद्यालय व्यवस्थापन समिति तथा कृषि धारको संयोजनमा गरिएको यो प्रयासले ‘शिक्षा र श्रम सँगै’ भन्ने सोचलाई व्यवहारमा उतार्दै उदाहरणीय कार्य गरेको भन्दै सहभागी सबैले प्रशंसा गरेका छन्।
काठमाडौं, वैशाख २९, २०८२ – रिपोर्टिंग सम्बाददाता
नेपालमा पछिल्ला केही वर्षयता IVF अर्थात् In Vitro Fertilization प्रविधिको प्रयोग उल्लेखनीय रूपमा बढ्दो छ। विगतमा सन्तान प्राप्तिको लागि विदेश जानुपर्ने अवस्था भए पनि अहिले काठमाडौं, पोखरा, बुटवल, विराटनगर लगायतका सहरहरूमा आधुनिक IVF क्लिनिकहरू विस्तार भएका छन्। यस प्रविधिबाट सयौँ निःसन्तान दम्पतीले सन्तान प्राप्ति सम्भव बनाएका छन्।
यस प्रविधिको प्रयोग विशेषगरी तब गरिन्छ जब दम्पतीले दीर्घकालीन प्रयासपछि पनि सन्तान प्राप्त गर्न सकिरहेका हुँदैनन्। महिलाको Fallopian tube बन्द भएको, वीर्यमा गम्भीर समस्या रहेको, Endometriosis जस्ता रोगहरू भएको वा अघिल्ला गर्भधारणहरू बारम्बार असफल भएका अवस्थाहरूमा IVF उपयुक्त मानिन्छ।
उपचारको क्रममा सुरुमा महिलालाई अण्डा उत्पादन बढाउने विशेष हर्मोन औषधि दिइन्छ। त्यसपछि Ultrasound को सहायताले अण्डाशयबाट अण्डा निकालिन्छ। अर्कोतर्फ, पुरुषबाट वीर्य सङ्कलन गरिन्छ र स्वस्थ शुक्राणुहरू छुट्याइन्छन्। यी अण्डा र शुक्राणुलाई प्रयोगशालामा निषेचित गरी भ्रूण विकास गराइन्छ। विकसित भ्रूणलाई केही दिन शरीरबाहिर राखेर मूल्याङ्कन गरिन्छ, र सबैभन्दा स्वस्थ भ्रूण महिलाको गर्भाशयमा स्थानान्तरण गरिन्छ। यसरी सफल भएमा गर्भ रहन्छ।
काठमाडौंस्थित Healthline Fertility Center, Nepal Fertility Centre, Vatsalya IVF, Norvic IVF लगायतका क्लिनिकहरूले पछिल्लो समय उल्लेखनीय सफलता हासिल गरिरहेका छन्। क्लिनिकहरूमा दैनिक १० देखि १५ जना निःसन्तान दम्पती परामर्शका लागि आउने गरेका छन्। एक प्रजनन विशेषज्ञका अनुसार, “पछिल्लो पाँच वर्षमा IVF उपचारको माग दोब्बर भएको छ। यस उपचारका निम्ति पहिले विदेश जानुपर्ने अवस्था थियो, तर हाल नेपालकै विभिन्न शहरहरुमा यो सेवा सहज रूपमा उपलब्ध छन्।”
नेपालमा सन्तान नहुने समस्याको समाधानका रूपमा IVF (In Vitro Fertilization) प्रविधिको प्रयोग तीव्र रूपमा बढिरहेको छ। राजधानी काठमाडौंदेखि विराटनगरसम्म फैलिएका प्रजनन उपचार केन्द्रहरूमा दैनिक सयौँ दम्पती IVF को परामर्शमा पुगिरहेका छन्। तर, यो प्रविधिको बढ्दो निर्भरता के दीर्घकालीन समाधान हो, वा नयाँ समस्या निम्त्याउने खतरा पनि बोकेको छ?
विशेषज्ञहरू भन्छन्, पछिल्लो समय बढ्दो तनाव, दम्पतीको ढिलो विवाह, प्रदूषण, जीवनशैलीका कारण निःसन्तानता वृद्धि भएको छ। यसैकारण IVF प्रविधिमा आकर्षण बढेको हो। तर, उपचारको लागत महँगो हुनु, प्रक्रिया तनावपूर्ण र कहिलेकाहीँ पुनः प्रयास गर्नुपर्ने अवस्था आउनुले यसमा निर्भरता बढ्नु स्वयंमा चिन्ताको विषय बन्न थालेको छ।
केही दम्पतीहरू बारम्बार IVF प्रयास गर्दा पनि सफल नहुने र मानसिक तथा आर्थिक दुवै दृष्टिले थकित हुने गरेका छन्। अर्कोतर्फ, कतिपय निजी केन्द्रहरूले अत्यधिक प्रचार गरेर मानिसहरूलाई उपचारका लागि आकर्षित गरिरहेको आरोप पनि लाग्न थालेको छ। नियमनको स्पष्ट मापदण्ड नहुँदा उपचारको गुणस्तर, पारदर्शिता र शुल्क निर्धारणमा समेत प्रश्न उठ्न थालेका छन्।
नेपालमा हालसम्म IVF प्रविधिलाई नियमित गर्ने कुनै स्पष्ट कानुनी ढाँचा छैन। यसले गर्दा भविष्यमा यो क्षेत्रमा नैतिक र कानुनी विवाद बढ्ने सम्भावना पनि विशेषज्ञहरूले औंल्याएका छन्।
यसबीचमा चिकित्सा वैज्ञानिकहरूले IVF लाई समाधानको रूपमा लिनुपर्ने भए पनि यसको प्रयोग सतर्क ढंगले र आवश्यक परामर्शपछि मात्र गर्नुपर्ने सुझाव दिएका छन्। नत्र यसप्रति बढ्दो निर्भरता समाजमा नयाँ समस्याहरू उत्पन्न गर्न सक्ने सम्भावना रहन्छ।
२२ जेष्ठ २०८१, बर्दिया | बर्दिया जिल्लाको बारबर्दिया नगरपालिका वडा नम्मर ४ घोरपिट्टामा २ पालिका बारबर्दिया र गुलरिया अन्तर्गतको वार्ड स्तरीय पुरुष फुटबल तथा महिला कबड्डी खेल प्रतियोगिताको संचालन भैरहेको छ l
हिजो २१ गतेका दीन प्रमुख अतिथि प्रदेश सभासद माननीय राजकुमार थारुको प्रमुख आतिथ्य, बारबर्दिया नगरपालिका प्रमुख छबिलाल थारु र सामाजिक बिकाश डिभिजन कार्यालय बाकेका कार्यालय प्रमुख उद्धब प्रसाद श्रेष्ठको बिशेष आतिथ्यमा उदघाटन भयको हो l अतिथिमा वडा नम्मर ४ का वडा अध्यक्ष तथा नगर प्रबक्ता सिताराम योगीले अतिथिको आसन ग्रहण गर्नुभएको थियो भने कार्यक्रमको अध्यक्षता कार्यक्रमको आयोजक क्लब श्री शिव शक्ती युवा क्लब ४ घोरपिट्टाका अध्यक्ष ओम प्रकाश थारुले गर्नुभयको थियो l
कार्यक्रम संचालनको निम्ति प्रदेश सभासद माननीय राजकुमार थारुको पहलमा सामाजिक बिकाश डिभिजन कार्यालय मार्फत आर्थिक सहयोग गरेको कार्यक्रमको अध्यक्ष ओम प्रकाश थारुले जानकारी गराउनु भयो l
२० चैत्र २०८०, बर्दिया | बारबर्दिया नगरपालिकामा आज ६७ औ राष्ट्रिय सहकारी दिवश विभिन्न नारा लेखियको कार्ड सहित र्याली गर्दै विबिध कार्यक्रम गरि भव्यताका साथ मनाइएको छ। करिब ४०० जनाको उपस्थितिमा आयोजित उक्त कार्यक्रमको उद्घाटन ७ वटा मैन बत्ती बालेर कार्यक्रमका प्रमुख अतिथी बारबर्दिया नगर प्रमुख छविला थारुले गरेका थिय ।
कार्यक्रमको अध्यक्षता आर्थिक बिकाश समिति संयोजक राम फेरन थारुले गरेका थिय भने बिशेष अतिथिमा उप प्रमुख रत्ना कुमारी पाण्डे र बिशिष्ठ अतिथिमा प्रमुख प्रशाशकिय अधिकृत धर्मराज न्यौपानेले आशनग्रहण गरेका थिय । अतिथिहरुमा क्रमश : बारबर्दिया नगर सहकारी संजाल संयोजक दत्त प्रसाद अधिकारी , नगर प्रबक्ता वडा नम्मर ४ का वडा अदक्ष सिताराम योगी लगायतका व्यक्तिहरु थिय।
सुभकामना मन्तब्य दिने क्रममा प्रमुख प्रशाशकिय अधिकृत न्यौपानेले सम्पूर्ण सहकारीहरू विधिबाट चल्नु पर्छ र जनताको हित हुने काम र योजना निर्माण गर्न एक्लो सहकारीले नसकेमा अन्य सहकारीहरू मिलेर सहकार्य गर्नुपर्ने बतायका छन् । सहकारीको सदस्यहरुको ५० प्रतिशत उपस्थिति बिना कार्यक्रम गरि बजेट स्वीकृत गर्ननहुने र त्यस्तो कार्य गरेमा कहिँ कतै बाट उजुरी परेमा कानुनि कारबाही हुने जानकारी समेत गराएका छन्।आफ्नो स्वार्थको निम्ति सहकारीको नीति नियम र कानुनको पालना नगर्ने यौटा कुनै अमुक सहकारीको स्वार्थका कारण बर्दिया जिल्ला बन्धक बनेको समेत बताए । मन्तव्यका क्रममा सहकारीहरूले सहकारी भित्र मात्र लगानी गर्नुपर्ने र आफ्नो सहकारीको सदस्य भित्र लगानी नगर्दा सहकारीलाई जोखिम हुने बताउदै सहकारीहरुको उत्तरोत्तर प्रगतिको कामना सहित आफ्नो स्वागत मन्तब्य अन्त्य गरेका थिय ।
बिशिष्ट अतिथि रत्ना पाण्डेले सहकारीहरू चुस्त दुरुस्त राख्न निर्देशन दिदै बचतकर्ताले बचत गरेको रकम आफुहरुले नपाएको गुनासो र उजुरी परेको बताईन । अनुगमनमा जादा सहकारीको कार्यालय बन्द हुने कहिल्यै नखुल्ने र संचालक तथा कर्मचारी कोहि पनि कहिल्यै नभेटिने समस्या रहेको गुनासो पोखिन। नगरपालिकाको न्यायपालिकामा बचतकर्ताले बचत गरेको रकम नपाएको उजुरी परेको र बचतकर्ताले बचत गरेको रकम फिर्ता दिनु भनि निर्देशन दिदा र बारम्बार पत्र काट्दा पनि बेवास्ता गरिरहेको हुदा अब त्यस्ता सहकारिहरुलाई कानुनी दायरामा ल्याइने जानकारी गराइन ।
बिशिष्ट अतिथि रत्ना पाण्डे पश्चात प्रमुख अतिथि छबिलाल थारुले सुभकामना मन्तब्य दिएका थिय । सुभकामना मन्तव्यको क्रममा सहकारीहरूले सदस्यहरुलाई वित्तीय साक्षारता दिन नसके सहकारी पछाडी पर्ने हुदा सहकारीहरूले आफ्ना शेयर सदस्यहरुलाई वित्तीय साक्षारता गराउनुपर्ने धारणा ब्यक्त गरेकाछन । सहकारीहरूले आआफ्नो उदेश्य अनुसार कार्य गर्नुपर्ने बताउदै कृषी सहकारीहरूले रिण दिने ब्याज उठाउने र लगानी गर्ने मात्र नभई आफ्ना कृषक हरुलाई उचित समयमा मल बिउ बिजन तथा औसधि समेत समयमै उपलब्ध गराउनुपर्ने बताए । नगरपालिकाले सहकारीलाइ सक्षम र सबल गराउन हातेमालो गर्न तयार रहेको बताउदै सहकारीका पदाधिकारीहरु आफ्नो स्वार्थलाई छोडेर एकीकरण प्रक्रियामा जानुजरुरी भयको स्पस्ट पारेकाछन ।
अथितिहरुको सुभकामना मन्तब्य पश्चात सहकारी संस्था हरु बीच हाजिरी जवाफ प्रतियोगिता संचालन भयको थियो। प्रतियोगितामा सहकारीकै बिषयबस्तुलाइ लियर प्रश्न तयार परिएको थियो। उक्त प्रतियोगितामा ९ वटा सहकारी समूह प्रतिस्प्रधामा उत्रियका थिय जस मध्ये प्रथम ,द्वितीय र तृतीय क्रमश: सैदान बचत तथा ऋण सहकारी संस्था , बुढान साना किसान कृषि सहकारी संस्था र भाग्यशाली महिला बिकाश बहुउदेश्य सहकारी भयका छन्।
सहकारी बाट ऋण लियर उत्कृस्ट व्यवसाय संचालन गर्न सफल बारबर्दिया वडा नम्मर ४ पदनाहाका कृषक राम मिलन थारु उत्कृस्ट व्यवसायीको रुपमा सम्मानित भयका थिय।
कार्यक्रमको अध्यक्ष आर्थिक बिकाश समिति संयोजक राम फेरन थारुले कार्यक्रमको समापन गरेको घोसणा पश्चात कार्यक्रम सकियको थियो ।
२० बैशाख २०८१, बर्दिया | चक्र अविरल | ईलाका प्रहरी कार्यालय जयनगर बर्दियाको नवनिर्मित भवन समुदघाटन कार्यक्रम सम्पन्न भएको छ । प्रमुख अतिथि लुम्बिनि प्रदेश प्रहरी प्रमुख प्रहरी नायव महानिरिक्षक कुबेर कडायतले रिवन काटेर भवन उदघाटन गर्नुभएको हो । लुम्बिनि प्रदेश सरकारको नियमित बजेट अन्तर्गत निर्माण गरिएको उक्त भवन एम पि कन्ट्रक्सन बाँकेले ठेक्का पाएको थियो ।
करिव पाँच कठ्ठामा अवस्थित आफ्नै जग्गामा निर्माण भएको कार्यालयको उदघाटन कार्यक्रममा विशिष्ठ अतिथिहरु बर्दिया जिल्लाका सहायक प्रमुख जिल्ला अधिकारि रोशन कुमार कठायत , बारबर्दिया नगरपालिकाको उपप्रमुख रत्ना कुमारी पाण्डे लगाएत अतिथि वक्ता हरुले शुभकामना मन्तव्य दिनुभएको थियो ।
मन्तव्य दिँदै उपप्रमुखले बारबर्दिया राजनितिक र भौगोलिक आधारमा अलग अलग हुँदा इलाकाको सेवा क्षेत्र विभाजन हुनु परेको र जनतालाई सास्ति खेप्नु परेको गुनासो समेत गर्नु भयो उहाँले इलाका प्रहरी कार्यालय जयनगर ले नै यस नगरपालिका को ११ वटै वडामा सेवा दिने वातावरण मिलाउन प्रहरी नायव महानिरिक्षक समक्ष अनुरोध गर्नु भयो । बारबर्दिया नगरपालिका का प्रमुख प्रशाशकिय अधिकृत धर्मराज न्यौपाने , जिल्ला प्रहरी कार्यालय बर्दियाका प्रमुख प्रहरी उपरिक्षक प्रविण धिताल , शशस्त्र प्रहरी बल ३१ नम्मर गण हेडक्वाटरका प्रमुख सशस्त्र प्रहरी उपरिक्षक चित्राङ्गत दाहाल , राष्ट्रीय अनुसन्धान कार्यालय बर्दियाका उप अनुसन्धान निर्देशक पवन जोशि , बज्र दल गुल्म बर्दियाका सेनानि सुबोध कुवँर , लुम्बिनि प्रदेश प्रहरी कार्यालय टि एस टि प्रमुख प्रा. ना. उ. इ. रोशन सारु , शशस्त्र प्रहरी बल व्यस क्याम्प कतर्निया बर्दियाका प्रमुख स. प्र. ना. उ. छवि रावत , पुर्व प्रहरी बर्दिया का अध्यक्ष टंक बहादुर थापा लगाएत का व्यक्तिहरुको उपस्थितिका बीच उदघाटन गरिएको उक्त कार्यालयबाट आजै देखि नै सेवा सुचारु गरिएको छ ।
स्थानिय ठग्गु लाल शर्माले तिन कट्ठा जग्गा दान गर्नु भएपछि भवन निर्माण गरि सेवा सुचारु गर्दै आएको कार्यालय सशस्त्र द्वन्दकालमा ध्वस्त गरिए पछि बारबर्दिया नगरपालिकाको बानिया भारबाट सेवा दिँदै आएको थियो । हाल ठग्गु लाल शर्माले त्यस समयमा दान दिएको जग्गा सङ्गै सार्बजनिक जग्गा सहित करिब ५ कट्ठामा कार्यालय स्थापना गरिएको छ ।
जग्गादान गर्ने ठग्गु लाल शर्मा सहित उत्कृष्ट प्रहरी कर्मचारीहरु प्रहरी निरीक्षक मनिष श्रेष्ठ , प्रहरी नायब निरीक्षक शशी वली , प्रहरी जवान लक्ष्मण सुनारलाइ उक्त कार्यक्रममा प्रमुख अतिथि द्वारा सम्मान गरियको थियो ।
समारोहमा बोल्दै प्रमुख अतिथि लुम्बिनि प्रदेश प्रहरी प्रमुख प्रहरी नायव महानिरिक्षक कुबेर कडायतले यस कार्यालयले छिटो छरितो र उत्कृष्ट सेवा दिनेमा आफु विश्वस्त रहेको बताउनु भयो । सुचना बिना प्रहरी एक्लैले केहि गर्न नसक्ने र सुचकको नाम गोप्य राखिने हुँदा समाजमा घटेका घटनाहरुलाई सुचना गरि प्रहरी लाई सहयोग गर्न सबैमा अनुरोध गर्नु भयो ।
करिव तिन बजे बाट सुरु गरिएको उक्त समारोहमा प्रमुख अतिथि तथा विशिष्ट अतिथि लगायतले वृक्षारोपण समेत गरेका थिए । प्रमुख अतिथि लुम्बिनि प्रदेश प्रहरी प्रमुख प्रहरी नायव महानिरिक्षक कुबेर कडायतले नव निर्मित भवनको उदघाटन सङ्गै अवलोकन समेत गर्नुभएको उक्त समुदघाटन कार्यक्रममा संचालकको भूमिका इलाका प्रहरी कार्यालय बानियाँभारका कार्यालय प्रमुख प्रहरी निरिक्षक मनिष श्रेष्ठ ले निर्वाह गर्नुभयको थियो ।
१० असार २०८२, सुमित्रा सुबेदी, नेपालगञ्ज
योग समिति नेपालका परिकल्पनाकार, केन्द्रीय संस्थापक अध्यक्ष तथा सुप्रसिद्ध आयुर्वेदाचार्य योगगुरु गिरिराजज्यूको जन्मोत्सवको अवसरमा नेपालगञ्जमा विविध सामाजिक गतिविधिहरू सम्पन्न भएका छन्। जन्मोत्सवलाई सामाजिक रूपले अर्थपूर्ण बनाउन असार ९ गते जन्मोत्सवको पूर्वसन्ध्यामा रक्तदान तथा वृक्षारोपण कार्यक्रम आयोजना गरिएको हो।
नेपाल रेडक्रस सोसाइटी बाँके शाखा सभापति समेत रहनुभएका योगगुरु गिरिराजज्यूले नेपालगञ्जस्थित भेरी अस्पतालको रक्त संचार सेवा केन्द्रमा आयोजित कार्यक्रममा आफैँ पनि रक्तदान गर्नुभयो। उहाँले स्वस्थ व्यक्तिको शरीरमा प्रत्येक तीन महिनामा पुरानो रगत स्वतः नष्ट भइ नयाँ रक्त निर्माण हुने भएकाले नियमित रूपमा रक्तदान गर्नु आवश्यक रहेको बताउनुभयो। “समयमै रक्तदान गरेर अरुको जीवन बचाउन सकिन्छ, तीन महिनामा नष्ट हुने रगतको सदुपयोग यही हो,” उहाँको भनाइ थियो।
कार्यक्रममा ६० जनाभन्दा बढी योगप्रेमी, स्वयंसेवक तथा सामाजिक अभियन्ताहरूले रक्तदान गरेका थिए। कार्यक्रमको उद्घाटन नेपाल रेडक्रस सोसाइटी बाँके शाखाका सभापति गोवर्धन सिंह सम्झानाले रक्तदाता निर्मला शाह र अम्बिका कोईरालालाई रक्त सङ्कलनको प्याकेट हस्तान्तरण गरी गर्नु भएको थियो।
सो अवसरमा नेपालगञ्ज लगायतका विभिन्न जिल्लामा सक्रिय ४६ वटा योग केन्द्रका प्रतिनिधिहरूलाई आ–आफ्ना केन्द्रमा वृक्षारोपणका लागि बिरुवा वितरण गरिएको थियो। प्रत्येक केन्द्रमा हरियाली प्रवर्द्धन गर्ने उद्देश्यले वृक्षारोपण कार्यक्रम सञ्चालन गरिने जनाइएको छ। वृक्ष वितरणमार्फत वातावरण संरक्षणको सन्देश पनि फैलाउने प्रयास गरिएको छ।
साथै, योग समिति नेपालले केही समयअघि खरिद गरेको भूमिमा निर्माणाधीन गुरुद्वाराभित्र वृक्षारोपण कार्यको शुभारम्भ समेत गरिएको छ। यसले योग केन्द्र र गुरुकुललाई हरित र शान्त वातावरणमा स्थापना गर्न सहयोग पुर्याउने अपेक्षा गरिएको छ।
रक्तदान तथा वृक्षारोपण कार्यक्रममा योग समिति नेपालका सल्लाहकार मीन बहादुर मल्ल, जगदीशचन्द्र तिमल्सिना, रेडक्रसका प्रविधिक अधिकृत उपेन्द्र रेग्मी, योगप्रेमी समाजसेवी निल साक्य, हरित अभियन्ता हेमन्त काफ्ले लगायत ४८ वटा केन्द्रबाट आएका संयोजक, प्रशिक्षक, आजीवन सदस्य तथा योगमा विश्वास गर्ने योगप्रेमीहरूको उल्लेखनीय उपस्थिति थियो।
कार्यक्रमको संयोजन योग प्रशिक्षक प्रेम केसीले गर्नुभएको थियो भने विस्तृत जानकारी प्रशिक्षक सुमित्रा सुबेदीले दिनुभयो।
सामाजिक सद्भाव, स्वास्थ्य तथा वातावरणप्रति जिम्मेवारी दर्शाउने उद्देश्यले गरिएको यो कार्यक्रमले योगगुरुको जन्मोत्सवलाई अर्थपूर्ण बनाएको सहभागिहरूले बताएका छन्।
७ असार २०८२, सुमित्रा पण्डित, नेपालगञ्ज—“एक पृथ्वी, एक स्वास्थ्यका लागि योग” भन्ने मूल नाराका साथ ११ औं अन्तर्राष्ट्रिय योग दिवस खजुरा गाउँपालिका र नेपालगञ्जमा विभिन्न कार्यक्रमहरू गर्दै भव्य रूपमा मनाइएको छ।
योग समिति नेपाल अन्तर्गतका खजुरा गाउँपालिकाका ८ वटा योग केन्द्रहरूमार्फत ब्यान्ड बाजासहितको र्याली निकालिएको थियो। र्याली खजुरा गाउँपालिका वडा नम्बर २ मा पुगेर सभामा परिणत भएको थियो, जहाँ योग अभ्यास पनि गरिएको थियो।
कार्यक्रम योग समिति नेपालका अध्यक्ष तथा योग गुरु आयुर्वेदाचार्य गिरीराज ज्युको सभापतित्वमा सम्पन्न भएको थियो। प्रमुख अतिथि वडा नम्बर २ का अध्यक्ष धनिराम वलीले योगले मानव स्वास्थ्यका लागि शारीरिक, मानसिक र आध्यात्मिक दृष्टिले लाभदायक अभ्यास भएको उल्लेख गर्दै सबै नागरिकले योगलाई जीवनशैलीमा अपनाउनु पर्ने आवश्यकता औँल्याउनुभयो।
अध्यक्ष वलीले खजुरा गाउँपालिकालाई योगमय बनाउन प्रतिबद्धता व्यक्त गर्दै योग समिति नेपालले वडा–वडामा सचेतना फैलाएर योग अभ्यासलाई प्रवर्द्धन गर्दै आएकोमा धन्यवाद समेत दिनुभयो। हालसम्म खजुरामा ८ वटा योग केन्द्र स्थापना भइसकेकोमा खुसी व्यक्त गर्दै उहाँले सधैं सहयोग गर्ने आश्वासन पनि दिनुभयो।
कार्यक्रममा योग गुरुले विभिन्न योग, प्रणायाम र ध्यान गराउँदै पछिल्लो समयमा मानिसहरू योगप्रति आकर्षित भइरहे पनि विषादीयुक्त खानपान र ब्यस्त जीवनशैलीले स्वास्थ्यमा नकारात्मक असर पारेकोप्रति चिन्ता व्यक्त गर्नुभयो। उहाँले नागरिकलाई दैनिक रूपमा योग केन्द्रमा गई योग अभ्यास गर्न आह्वान गर्नुभयो।
कार्यक्रममा योग समिति नेपालका पदाधिकारीहरू, खजुरा गाउँपालिका र अन्य केन्द्रका संयोजकहरू, योग प्रशिक्षक, समाजसेवी, बुद्धिजीवी, पत्रकार लगायत सयौँ संख्यामा योगीजनहरूको उपस्थिति रहेको याेग समिती नेपालको उपाध्यक्ष लोकमाया सुवेदी (सुमित्रा) ले जानकारी दिनुभयो। कार्यक्रम सञ्चालन योग प्रशिक्षक आशिष ज्ञवालीले गर्नुभएको थियो।
